ក្រុមការងារចាក់វ៉ាក់សាំងបង្ការជំងឺកូវីដ-១៩ របស់កងពលតូចថ្មើរជើងលេខ៤១ បន្តចាក់វ៉ាក់សាំងប្រភេទ CINOVAC ម្ជុលទី២ ជូនកុមារ និងយុវជនអាយុចាប់ពី១២ឆ្នាំ ដល់អាយុក្រោម១៨ឆ្នាំ

ខេត្តឧត្ដរមានជ័យ : នៅព្រឹកថ្ងៃទី០៨ ខែកញ្ញា ឆ្នាំ២០២១ ក្រុមការងារប្រតិបត្តិការចាក់វ៉ាកសាំងបង្ការជំងឺកូវីដ-១៩ ដឹកនាំដោយ ឧត្តមសេនីយ៍ត្រី ផៃ សុផាត មេបញ្ជាការរង នាយសេនាធិការ និងជាប្រធានក្រុមការងារចាក់វ៉ាក់សាំង កងពលតូចថ្មើរជើងលេខ៤១ បានដឹកនាំក្រុមការងារចុះចាក់វ៉ាក់សាំងបង្ការជំងឺកូវីដ-១៩ ជូនកុមារចាប់ពីអាយុ១២ឆ្នាំ ដល់អាយុក្រោម១៨ឆ្នាំ ចាក់ម្ជុលទី២នៅមណ្ឌលវត្តទួលទ្រាស ស្ថិតនៅភូមិទួលទ្រាស ឃុំលំទង ស្រុកអន្លង់វែង ខេត្តឧត្តរមានជ័យ។សូមបញ្ជាក់ជូនថា កុមារ និងយុវជនចាប់ពីអាយុ១២ឆ្នាំ ដល់អាយុក្រោម១៨ឆ្នាំ នៅក្នុងឃុំលំទង ស្រុកអន្លង់វែង ខេត្តឧត្តរមានជ័យចំនួន១,៤៦៨នាក់(ស្រី៧០៨នាក់)ដែលបានមកទទួលការចាក់វ៉ាក់សាំងបង្ការជំងឺកូវីដ-១៩ដោយស្ម័គ្រចិត្តនូវម្ជុលទី១ កាលពីថ្ងៃទី១៨ ដល់ថ្ងៃទី២០ ខែសីហា ឆ្នាំ២០២១ ពីក្រុមការងារចាក់វ៉ាក់សាំងកងពលតូចថ្មើរជើងលេខ៤១ បាននាំគ្នាមកទទួលយកការចាក់វ៉ាក់សាំងប្រភេទCinovacម្ជុលទី២ យ៉ាងច្រើនកុះករតាមកាលបរិច្ឆេទរបស់ក្រុមគ្រូពេទ្យ។ ក្នុងកិច្ចដំណើរការចាក់វ៉ាក់សាំងនេះ ក៏មានការសហការចូលរួមពីអាជ្ញាធរឃុំ ស្រុក ក្រុមយុវជន សសយក និងសមត្ថកិច្ចពាក់ព័ន្ធកំពុងដំណើរការចាក់យ៉ាងមមាញឹក។ បើទោះបីអាកាសធាតុមិនអំណោយផល មានភ្លៀងធ្លាក់យ៉ាងណាក្តី ក៏កុមារ និងយុវជនអាយុចាប់ពី១២ឆ្នាំ ដល់អាយុក្រោម១៨ឆ្នាំ បានធ្វើដំណើរមកចាក់វ៉ាក់សាំងទាំងក្តីរំភើបរីករាយ និងប្រកបដោយស្នាមញញឹម៕