ជនអន្តោប្រវេសន៍ខុសច្បាប់ជនជាតិថៃចំនួន៦៦នាក់ ត្រូវបានអាជ្ញាធរកម្ពុជា ប្រគល់ជូនទៅអជ្ញាធរថៃវិញ
ខេត្តបន្ទាយមានជ័យ : ព្រឹក ថ្ងៃទី ១៦ ខែ វិច្ឆិកា ឆ្នាំ ២០២១នេះ អាជ្ញាធរក្រុងប៉ោយប៉ែត បានធ្វើពិធីប្រគល់
ជនអន្តោប្រវេសន៍ខុសច្បាប់ជាជនជាតិថៃចំនួន៦៦នាក់ ស្រី២៤នាក់ ទៅឲ្យអាជ្ញាធរថៃវិញ នៅម៉ោង១០ និង៤០ នាថ្ងៃទី១៦ ខែវិច្ឆិកា ឆ្នាំ ២០២១ នៅលើស្ពានមិត្តភាពកម្ពុជា- ថៃ ច្រកទ្វារព្រំដែនអន្តរជាតិប៉ោយប៉ែត -ខ្លងលឹក ។
ពិធីប្រគល់ជនអន្តោប្រវេសន៍ខុសច្បាប់ជនជាតិថៃ ទៅឲ្យប្រទេសថៃនោះ មានការចូលរួមពី ឧត្តមសេនីយ៍ទោ យី គាលី អនុប្រធាននាយកដ្ឋានអន្តោប្រវេសន៍ ទទួលទិសច្រកទ្វារទី១ ព្រមទាំងមន្ត្រី២៥នាក់ លោកឧត្តមសេនីយ៍ឯក សម វណ្ណវីរ: ប្រធាននាយកដ្ឋានសន្តិសុខផ្ទៃក្នុង តំណាងភាគីកម្ពុជា និងលោក ប៉ានយ៉ារ៉ាក់ ពុលថាប់ (Mr Panyarak Poolthup ) ឯកអគ្គរាជទូតថៃប្រចាំនៅកម្ពុជា តំណាងភាគីថៃ និងលោកឧ.ទោ ស៊ុរ:ឆេត ហាក់ផាន អគ្គស្នងការរង អន្តោប្រវេសន៍ថៃ លោក ព្រីនយ៉ា ពោធិ៍សាត់ អភិបាលខេត្ត ស្រះកែវ ប្រទេសថៃ និងសហការីចំនួន៣០នាក់ ។
ក្រោយពិធីផ្ទេរប្រគល់បានបញ្ចប់ ភាគីទាំងពីរបានជួបពិភាក្សាដើម្បី ផ្លាស់ប្តូរយោបល់ និងសុំឲ្យមានការយោគយល់គ្នា ទៅវិញទៅមក នៅក្នុងកាល:ទេស: សម័យកូវីដ១៩នេះ ។
យោងមន្ត្រីសមត្ថកិច្ចខ្មែរបានឲ្យដឹងថា ជនអន្តោប្រវេសន៍ខុសច្បាប់ជនជាតិថៃទាំងនោះ បានឆ្លងដែនខុសច្បាប់មកកម្ពុជាជាបន្តបន្ទាប់តាមផ្លូវគោក ផ្លូវទឹកមកកម្ពុជាដើម្បីធ្វើការងារមួយចំនួន មានល្បែងតាមអនឡាញ នៅតាមកាស៊ីណូ មានក្រុមហ៊ុនឬអាជីវកម្មជំនួញជាដើម៕
ដោយ៖ ឧត្តម
