ដោយសារភ័យករណីកូវីដ ក្មេងញៀនថ្នាំនៅមណ្ឌល់កែប្រែភ្នំបាក់ខេត្តបន្ទាយមានជ័យ ៥០នាក់នាំគ្នារត់ចេញ តែតាមចាប់បានមកវិញជិតអស់ហេីយ !
RMN.ASia>August 19, 2021
បន្ទាយមានជ័យ៖ មានករណីក្មេងញៀនគ្រឿងញៀន នៅមណ្ឌលកែប្រែភ្នំបាក់ ខេត្តបន្ទាយមានជ័យ បានរត់ចេញពីមណ្ឌលចំនួន ៥០នាក់ នៅវេលាម៉ោង ៧:៣០នាទី ថ្ងៃទី១៨ ខែសីហា ឆ្នាំ២០២១ ប៉ុន្តែ កម្លាំងសមត្ថកិច្ច បានតាមចាប់យកមកវិញបានចំនួន ៤៧នាក់ហើយ នៅចំនួន ៣នាក់ ទៀតកំពុងតាមចាប់មកយកវិញ។តែបើតាមសេចក្តីប្រកាសព័ត៌មានរបស់រដ្ឋបាលខេត្តបន្ទាយមានជ័យ នៅថ្ងៃទី១៨ ខែសីហា ឆ្នាំ២០២១ បានឱ្យដឹងថា ខេត្តភាគខាងលិចជាប់ព្រំដែនថៃមួយនេះ មានអ្នកឆ្លងកូវីដ-១៩ចំនួន ៦៨៩នាក់ជាចំនួនដ៏ច្រើនមិនធ្លាប់មាន។ ក្នុងចំនួននេះ មានក្មេងបន្សាបគ្រឿងញៀនរាប់រយនាក់ឯណោះ បានឆ្លងកូវីដ-១៩ និងបណ្តាលឱ្យកើតមានជាចលាចលនៅក្នុងមណ្ឌល និងរត់ចេញពីមណ្ឌចំនួន ៥០នាក់ ហើយបានតាមចាប់យកមកវិញបានចំនួន ៤៩នាក់ហើយ គិតត្រឹមរសៀលថ្ងៃទី១៨ ខែសីហា ឆ្នាំ២០២១។ នៅមណ្ឌលជីវីតថ្មីភ្នំបាក់ ក្រុងសិរីសោភ័ណ មានជនបន្សាបសារធាតុញៀនចំនួន ៦៦៣នាក់ ក្នុងនោះមានចំនួន ៦០១នាក់ហើយបានរកឃើញឆ្លងកូវីដ-១៩ (២៧នាក់ឆ្លងជំងឺបំម្លែងថ្មី Delta)។ នេះបើយោងតាមការឱ្យដឹងពី លោក ពារ ម៉ានិត ប្រធានមណ្ឌលជីវិតថ្មីភ្នំបាក់ នៅល្ងាចថ្ងៃទី១៨ ខែសីហា ឆ្នាំ២០២១។លោក ពារ ម៉ានិត បានឱ្យដឹងថា ដោយសារស្ថានភាពនៃការឆ្លងរីករាលដាលនេះ បានធ្វើឱ្យក្មេងៗក្នុងមណ្ឌលមានការភ័យខ្លាច និងតក់ស្លុតយ៉ាងខ្លាំង រហូតនាំគ្នាសម្រុករត់ចេញក្រៅ តែត្រូវបានចាប់ខ្លួនត្រឡប់មកវិញហើយ។ ទន្ទឹមនឹងនេះ អាជ្ញាធរពាក់ព័ន្ធកំពុងធ្វើការបញ្ជូនពួកគេទាំងនោះទៅយកសំណាកបន្ទាន់នៅក្រុងប៉ោយប៉ែត(Delta) និងនៅក្នុងមណ្ឌលមួយចំនួន ក្នុងថ្ងៃនេះផងដែរ។លោក ពារ ម៉ានិតមិនបាននិយាយទេថាតើក្មេងក្នុងមណ្ឌលនេះទទួលបានការចាក់វ៉ាកសាំងការពារកូវីតហើយឬនៅនោះទេ?។សូមបញ្ជាក់ថា ក្នុងប្រតិបត្តិការតាមចាប់ក្មេងញៀនថ្នាំនេះ ដឹកនាំដោយផ្ទាល់ពី លោក អ៊ុំ រាត្រី អភិបាលខេត្តបន្ទាយមានជ័យ ដែលមានកម្លាំងតំបន់ប្រតិបត្តិការសឹករងបន្ទាយមានជ័យចំនួន ១៣នាក់ កម្លាំងផ្នែកសឹករងក្រុងសិរីសោភ័ណចំនួន ២នាក់ ដឹកនាំដោយ លោកឧត្តមសេនីយ៍ត្រី ជឹម ប៊ុនអាន មេបញ្ជាការតំបន់ប្រតិបត្តិការសឹករងបន្ទាយមានជ័យ និងកម្លាំងគណៈបញ្ជាការឯកភាពខេត្ត និងកម្លាំងគណៈបញ្ជាការឯកភាពក្រុងផងដែរ។ ក្នុងករណីនេះ គេមិនទាន់ដឹងពីមូលហេតុនៃការរត់ចេញពីមណ្ឌលនៅឡើយទេ៕
