បុរសម្នាក់បានស្លាប់ក្រោយត្រូវទ្រុងបែនដឹកដីរថយន្ត សង្កត់ស្លាប់ខណៈពេលកំពុងជួសជុល

RMN.ASIA. 3/8/2021
ភ្នំពេញ ៖ នៅថ្ងៃទី៣ ខែសីហា ឆ្នាំ២០២១ កាលពីវេលាម៉ោង១១:១២នាទី បុរសម្នាក់បានស្លាប់ភា្លមៗក្នុងហេតុការណ៍គ្រោះថ្នាក់ខណៈពេលកំពុងជួសជុលដូយបែនដឹកដីក៏ត្រូវធ្លាក់ទ្រុងបែនដឹកដីកៀបសង្កត់ ហេតុការណ៍ ស្ថិតនៅភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។

ប្រភពព័ត៌មានបានបញ្ជាក់ថា បុរសដែលបានស្លាប់គឺជាអ្នកបើកបររថយន្តបែនដឹកដី បានដឹកដីពីកន្លែងស្តារប្រឡាយទួលពង្រមកចាក់បំពេញទីតាំងដីឡូតិ៍ចំណុចកើតហេតុ ស្រាប់តែទើបចាក់់បានតែ២ឡាន រថយន្តរបស់ជនរងគ្រោះបានខូចបែនមិនអាចទម្លាក់ចុះមកវិញបាន ទើបជនរងគ្រោះបានធ្វើការជួលជុលដោយឈរពីខាងក្រោមទ្រុងបែនដឹកដី ។លុះកំពុងជួសជុលមួយសន្ទុះទ្រុងបែនដឹកដីបានធ្លាក់មកវិញកៀបជាប់សង្កត់បុរសរងគ្រោះពេញតួខ្លួន បណ្តាលអោយស្លាប់ភ្លាមៗតែម្តង ។

ជនរងគ្រោះមានឈ្មោះ ប៊ុន​ កុល អាយុ៤០ឆ្នាំ មុខរបរ បើកបររថយន្ត មានស្រុកកំណើតនៅភូមិ ត្រពាំងអុស ឃុំផ្សារឆ្នាំង ស្រុកកំពង់ឆ្នាំង ខេត្តកំពង់ឆ្នាំង ។

ក្រោយកើតហេតុសមត្ថកិច្ចជំនាញបានធ្វើកោសល្យវិច្ច័យ រួចប្រគល់សាកសពអោយក្រុមគ្រួសារធ្វើបុណ្យតាមប្រពៃណី ៕