គ្រោះថ្នាក់ចរាចរណ៍ រថយន្តដឹកទំនិញ របស់ក្រុមហ៊ុនវីរៈប៊ុនថាំ បុកម៉ូតូ ពីក្រោយ បណ្ដាលអោយនារីមួយនាក់បានបាត់បង់ជីវិតនៅនឹងកន្លែងកើតហេតុហើយបុរសម្នាក់បានរងរបួស

ខេត្តកំពង់ឆ្នាំងៈ កាលពី ថ្ងៃទី៥ ខែតុលា ឆ្នាំ២០២១ នៅលើកំណាត់ផ្លូវជាតិលេខ៥ ចន្លោះគីឡូម៉ែត្រ លេខ១០៣ និង ១០៤ ស្ថិតក្នុងភូមិថ្មកែវ ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង ។ករណីគ្រោះថ្នាក់ចរាចរណ៍នេះ បានបង្ក ឡើង ដោយរថយន្ត ម៉ាក ម៉ាយធីធូ (ឡានដឹកទំនិញរបស់ក្រុមហ៊ុនវីរៈប៊ុនថាំ) ពណ៌ទឹកក្រូច ពាក់ផ្លាកលេខ ភ្នំពេញ 3F-3887 បើកបរដោយឈ្មោះ សុខ បូរ៉ា ភេទប្រុស អាយុ៤៤ឆ្នាំ មានទីលំនៅភូមិព្រែកក្ដី ឃុំកាហែង ស្រុកសំរោងទងខេត្តកំពង់ស្ពឺ។

រថយន្តបង្ក បានបើកបរពីទិសខាងកើត ទៅទិសខាងលិច លុះមកដល់ចំណុច កើតហេតុខាងលើ ក៏បានបុកម៉ូតូ (ពីក្រោយ) ម៉ាក ស៊ុយហ្សុ៊យគី ស្មាស វី (Suzuki smash V) ពណ៌ក្រហម ពាក់ផ្លាកលេខ ភ្នំពេញ 1BT-9760 បើកបរ ដោយឈ្មោះ យ៉ៃ រដ្ឋា ភេទប្រុស អាយុ១៩ឆ្នាំ រស់នៅភូមិក្បាលឈើពុក ឃុំខ្យាង ស្រុកកណ្ដៀង ខេត្តពោធិ៍សាត់ បណ្ដាលអោយរងរបួសស្រាល និងអ្នករួមដំណើរម្នាក់ទៀត ឈ្មោះ សំ នីត ភេទស្រី អាយុ២១ឆ្នាំ រស់នៅភូមិឃុំជាមួយគ្នា បណ្ដាលអោយស្លាប់ភ្លាមៗ នៅនឹងកន្លែងកើតហេតុ។

សមត្ថកិច្ចអាជ្ញាធរដែនដីបានចុះទៅដល់កន្លែងកើតហេតុ ប្រមូលសំភារ វត្ថុតាង និងឃាត់ខ្នួនជនបង្ក បញ្ជូនទៅអធិការដ្ឋាននគរបាល ស្រុករលាប្អៀរ ដោយឡែក យុវជន រងរបួស ត្រូវបានបញ្ជូនទៅមន្ទីរពេទ្យបង្អែក ខេត្តកំពង់ឆ្នាំង ចំណែកសាកសពនារីរងគ្រោះ សមត្ថកិច្ច បានប្រគល់ជូនក្រុមគ្រួសារដើម្បីចាត់ចែងទៅតាមប្រពៃណី ៕