ឧត្តមសេនីយ៍ទោ សម សាមួន ស្នងការនគរបាលខេត្ដកំពង់ស្ពឺ អញ្ជើញជាអធិបតី ពិធីប្រកាសផ្ទេរភារកិច្ច តែងតាំងមុខតំណែង អធិការនគរបាលស្រុកបសេដ្ឋ!
ខេត្តកំពង់ស្ពឺ ៖ នាព្រឹកថ្ងៃ ១៣ ខែតុលា ឆ្នាំ២០២១នេះ ឧត្តមសេនីយ៍ទោ សម សាមួន ស្នងការនគរបាលខេត្ដកំពង់ស្ពឺ អញ្ជើញជាអធិបតី ពិធីប្រកាសផ្ទេរភារកិច្ច តែងតាំងមុខតំណែង អធិការនគរបាលស្រុកបសេដ្ឋ និងបំពាក់ឋានន្ដរស័ក្ក ជូនដល់មន្រ្ដីកងកម្លាំងក្រោមឱវាទ ។ ពិធីនេះ បានប្រារព្ធធ្វើឡើងនៅសាលប្រជុំសាលាស្រុកបសេដ្ឋ ដោយបានអនុវត្តយ៉ាងខ្ជាប់ខ្ជួនទៅតាមវិធានសុខាភិបាល។
បន្ទាប់ពីលោកអធិការ ដែលទើបប្រកាសចូលកាន់មុខតំណែងថ្មី ឡើងធ្វើការសន្យាប្តេជ្ញាចិត្តជូន គណៈអធិបតី ព្រមទាំងអង្គពីធីរួចមក ឧត្តមសេនីយ៍ស្នងការនគរបាលខេត្ដ បានមានប្រសាសន៍ចូលរួមអបអរសាទរលោកអធិការថ្មី ដោយបានគូសបញ្ជាក់ថា ការផ្លាស់ប្តូរតំណែងនៅពេលនេះ គឺជាក្រិតក្រម នៃការអនុវត្តការងារដែលចាំបាច់គេចមិនផុតពីការផ្លាស់ប្តូររបស់មន្រ្តីថ្នាក់ដឹកនៅតាមអង្គភាព ដែលជាផ្នែកមួយ នៃកំណែទម្រង់របស់នគរបាលជាតិ ដើម្បីអោយមានការបោះជំហានទៅមុខ ឆ្លើយតបភាពជាក់ស្តែងនូវតម្រូវការការងារ ហើយក៏ឱកាស និងបទពិសោធន៍ចំពោះមន្ត្រីនគរបាលជាតិផងដែរ។
លោកស្នងការ បានប្រកាសគាំទ្រ និងឯកភាពនៅការសន្យាប្តេជ្ញាចិត្តរបស់លោកអធិការថ្មីដែលទើបប្រកាសឡើងកាន់តំណែងថ្មី ហើយអ្វីដែលជាបញ្ហាសំខាន់ គឺការដឹកនាំអង្គភាពអោយមានវឌ្ឍនភាព មានសមត្ថភាពគ្រប់គ្រាន់ក្នុងការបំរើអោយការងារដឹកនាំបញ្ជា ពិសេសការបម្រេីផលប្រយោជន៍ជូនប្រជាពលរដ្ឋ កន្លងមកនៅអធិការដ្ឋាននគរបាលស្រុកបសេដ្ឋ បានរងនូវភាពអរិយភាពរវាងគ្នានិងគ្នាដោយការដឹកនាំគ្មាន ការសាមគ្គីភាពនិងការចូលរួមពីកងកម្លាំងក្រោមឱវាទ ពិសេសកត្ដាសមត្ថភាព របស់ថ្នាក់ដឹកនាំតែម្ដង អាកប្បកិរិយា សិល្បៈនៃការដឹកនាំ និយាយរួមការដឹកនាំគឺដោយភាព អន្ដោម័តមិនយកគំនិតយោបល់រួមជាធំដោយការអាងអំណាចនិងបុព្វសិទ្ធិរបស់ខ្នងបង្អែកដែលបានជួយជ្រោមជ្រែងបានតួនាទីមុខតំណែងកន្លងមករហូតមានការប្ដឹងផ្ដល់ចុះកាសែតហែកហួរពីសំណាក់កូនចៅ មន្រ្តីថ្នាក់ក្រោម។
លោកស្នងការ មានប្រសាសន៍ទៀតថា ការពង្រឹងអង្គភាព គឺជាការខិតខំពង្រឹងជំនាញ ការពង្រីកវិសាលភាពការងារ ពិសេសជំនាញមូលដ្ឋានភូមិឃុំសង្កាត់មានសុវត្ថិភាព ធ្វេីយ៉ាងណាអោយគ្របដណ្តប់គ្រប់នៅគ្រប់ផ្នែក គ្រប់ថ្នាក់ ពិសេសប៉ុស្ដិ៍នគរបាលរដ្ឋបាល។
លោកស្នងការ ក៏បានផ្តល់អនុសាសន៍គន្លឹះដល់អធិការនគរបាលស្រុកបសេដ្ឋ ថ្មី ថាក្នុងនាមជាមេដឹកនាំអង្គភាពត្រូវតែធ្វើជាគំរូ និងឈានមុខគេ មានសុភវិនិច្ឆ័យច្បាស់លាស់ ពង្រឹងវិន័យ ពង្រឹងសាមគ្គីភាពផ្ទៃក្នុង មិនអាចប៉ះដៃយកដៃ ប៉ះជើងយកជើងនោះទេ ត្រូវមានមនោសញ្ចេតនា មានភាពស្និទស្នាល ទន់ភ្លន់តែម៉ឺងម៉ាត់ ជាពិសេសការបែងចែកភារកិច្ចទទួលខុសត្រូវទៅតាមជំនាញអោយមានតម្លាភាព រាល់ការតែងតាំងមន្រ្ដីអោយទទួលបានមុខតំណែងត្រូវតែមានការប្រជុំវាយតម្លៃនិងការយកមតិភាគច្រេីនមិនត្រូវ យកបក្ខពួកលុយកាក់ជាធំ កត្ដានេះគឺនាំអោយមានបញ្ហាកេីតឡេីងគឺការបែកបាក់និងគ្មានគុណភាពការងារ។
ទន្ទឹមនោះ លោកស្នងការ បានសង្កត់ធ្ងន់អោយយកចិត្តទុកដាក់ទៅលើកាងារប្រចាំបញ្ជា ការល្បាតក្នុងភូមិសាស្រ្ដ ការកសាងអង្គភាពជម្រកស្នាក់នៅទីតាំងធ្វើការ ព្រោះថាការងារនេះ វាបានបង្ខិតសេវាបំរើអោយទៅជិតប្រជាពលរដ្ឋ ពិសេសកិច្ចអន្តរាគមន៍ សង្គ្រោះ បង្ក្រាប និងការដោះស្រាយបញ្ហាបានឆាប់រហ័ស ធ្វើបទបញ្ជាផ្ទៃក្នុង សម្រាប់ប្រសិទ្ធភាពការងារ របស់ក្រុមប្រចាំបញ្ជានេះផងដែរ។
ជាចុងក្រោយ លោកស្នងការបានជំរុញអោយលោកអធិការថ្មី ត្រូវសិក្សារៀនសូត្រយកគំនិតល្អៗដែលខ្លួនធ្លាប់បម្រេីការងារកន្លងមកប្រែក្លាយទម្លាប់អាក្រក់ៗ ពីមេដឹកនាំគឹតតែពីផលប្រយោជន៍សួនតួ មកជាប្រយោជន៍រួម ពិសេសកុំអោយចរិកជ្រាំដែលបក់បោកមកលេីទិដ្ឋភាពការងារថ្មី ដូច្នេះត្រូវពង្រឹងតួនាទី ក្នុងការគ្រប់គ្រងការប្រេីប្រាស់បញ្ជាដឹកនាំកងកម្លាំងប្រកបដោយតម្លៃ ៕
