ថ្នាំញៀនជាច្រើនកូនថង់តូច ជនសង្ស័យម្នាក់កំពុងលួចលក់ និងជក់ក្នុងក្រុងប៉ោយប៉ែត ត្រូវនគរបាលឃាត់ខ្លួនបាននៅ អូរព្រំដែន
លោកវរសេនីយ៍ឯក សូ ចាន់ណារី មេបញ្ជាការវរសេនាតូចការពារព្រំដែនគោកលេខ៩១១ បានឲ្យដឹងថា ជនសង្ស័យ មានឈ្មោះ អែល ឡៅ ភេទប្រុស អាយុ៥២ឆ្នាំ រស់នៅភូមិទួលពង្រ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ។
លោកវរសេនីយ៍ឯក សូ ចាន់ណារីបានបញ្ជាក់ឲ្យដឹងបន្តទៀតថាពេលកម្លាំងនគរបាលការពារព្រំដែនប៉ុស្តិ៍បឹងសាគូនិងកម្លាំងយោធាបានដើរល្បាត នៅពេលយប់តាមបន្ទាត់ព្រំដែនក្នុងការទប់ស្កាត់ពលករលួចឆ្លងដែនដោយខុសច្បាប់ ស្រាប់ប្រទះឃើញជនសង្ស័យកំពុងជិៈម៉ូតូហើយបានឃាត់សួរនាំនិងធ្វើការឆែកឆេររកឃើញថ្នាំញៀន ប្រភេទម្សៅក្រាមពណ៌ថ្លា ចំនួន៦កូនថង់តូចនិងថ្នាំញៀនប្រភេទមេតំហ្វាតាមីនគ្រាប់ពណ៌ក្រហម ដែលមានអក្សរ WY លើគ្រាប់ថ្នាំម្ខាង ចំនួន៤៨គ្រាប់ ដែលជនសង្ស័យបានលាក់ទុកនៅក្រោមកែបម៉ូតូ ។
ដោយអនុវត្តតាមបទបញ្ជារបស់លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ ជនសង្ស័យ ឈ្មោះអែល ឡៅ រួមទាំងវត្ថុតាងមានថ្នាំញៀនប្រភេទម្សៅក្រាមពណ៌ថ្លា ចំនួន៦កូនថង់តូចនិងថ្នាំញៀនប្រភេទមេតំហ្វាតាមីនគ្រាប់ពណ៌ក្រហម ដែលមានអក្សរ WY លើគ្រាប់ថ្នាំម្ខាង ចំនួន៤៨គ្រាប់រួមទាំង ម៉ូតូ០១គ្រឿង បានប្រគល់ឲ្យនគរបាលជំនាញផ្នែកប្រឆាំងគ្រឿងញៀននៃអធិការដ្ឋាននគរបាលក្រុងប៉ោយប៉ែត ដើម្បីរៀបចំសំណុំរឿង ចាត់ការតាមនិតិវិធីច្បាប់បន្ត៕
