ក្រសួងព័ត៌មានអំពាវនាវអោយអ្នកសារព័ត៌មានអញ្ជើញទៅចាក់វ៉ាក់សាំងដូសទី៣ ចាប់ពីថ្ងៃទី៨ដល់ថ្ងៃទី១៥ ខែកញ្ញា នៅមន្ទីរពេទ្យកុមារជាតិ
រាជធានីភ្នំពេញ៖ មន្ត្រីជាន់ខ្ពស់ ក្រសួងព័ត៌មាន បានអំពាវនាវដល់អ្នកសារព័ត៌មាន នៅរាជធានីភ្នំពេញ ដែលបានចាក់វ៉ាក់សាំងការពារកូវីដ-១៩ដូសទី១ និងដូសទី២ សូមអញ្ជើញទៅចាក់វ៉ាក់សាំងដូសទី៣ ឬដូសជំរុញឲ្យបានគ្រប់ៗគ្នា តាមការជូនដំណឹង របស់ក្រសួងសុខាភិបាល។កាលពីថ្ងៃទី១១ ខែសីហា ឆ្នាំ២០២១ ក្រសួងសុខាភិបាល បានជូនដំណឹងថា ចំពោះអ្នកសារព័ត៌មាន នៅរាជធានីភ្នំពេញ ដែលបានចាក់វ៉ាក់សាំងស៊ីណូហ្វាម ឬស៊ីណូវ៉ាក់ដូសទី១ និងដូសទី២រួចរាល់ សូមអញ្ជើញទៅចាក់វ៉ាក់សាំងអាស្ត្រាហ្សេនីកា ដូសជំរុញ ឬដូសទី៣ នៅមន្ទីរពេទ្យកុមារជាតិ គឺចាប់ផ្ដើមពីថ្ងៃទី៨ ដល់ថ្ងៃទី១៥ ខែកញ្ញា ឆ្នាំ២០២១ ចាប់ពីម៉ោង៨ព្រឹក ដល់ម៉ោង៥ល្ងាច។លោក មាស សុភ័ណ្ឌ អ្នកនាំពាក្យ ក្រសួងព័ត៌មាន មានប្រសាសន៍ថា ក្រសួងសុខាភិបាល បានជូនដំណឹងរួចហើយ ឲ្យអ្នកសារព័ត៌មាន នៅរាជធានីភ្នំពេញ ទៅចាក់វ៉ាក់សាំងដូសទី៣ នៅមន្ទីរពេទ្យកុមារជាតិ។ ដូច្នេះលោក អំពាវនាវដល់អ្នកសារព័ត៌មាន ដែលបានចាក់ដូសទី១ និងដូសទី២រួចរាល់ សូមទៅចាក់ឲ្យបានគ្រប់គ្នា ដើម្បីទប់ស្កាត់ការឆ្លងជំងឺកូវីដ-១៩។
