សិស្សសាលាម្នាក់ស្លាប់ ម្នាក់ទៀតរបួសធ្ងន់ ពេលជិះម៉ូតូចេញរៀនត្រូវរថយន្តបុកហើយរត់បាត់

ខេត្តបន្ទាយមានជ័យ : នេះជារឿងគួរឱ្យសង្វេគណាស់សិស្ស២នាក់ជិៈម៉ូតូឌុបគ្នាមកពីរៀនគួត្រៀមប្រឡងថ្នាក់ទី១២ ឆ្លងផ្លូវជាតិ ស្រាប់តែមានរថយន្តបើកក្នុងល្បឿនលឿននៅពេលយប់បើកមកបុកម៉ូតូពេញទំហឹងបណ្តាលឲ្យសិស្សស្លាប់១នាក់និងរបួសធ្ងន់១នាក់។រឿងរាវនេះកើតឡើងនៅវេលាម៉ោង៧និង១៥នាទីយប់ថ្ងៃទី២៩ ខែវិច្ឆិកា ឆ្នាំ២០២១ នៅលើកំណាត់ផ្លូវជាតិលេខ៥ ចំណុចមុខផ្សារអូរអំបិល ស្ថិតនៅ  ភូមិសង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ។

លោកវរសេនីយ៍ទោ សួន នីប៉ូ នាយរងការិយាល័យ នគរបាលចរាចរណ៍ខេត្ត បានឲ្យដឹងថា សិស្សរងគ្រោះមាន ឈ្មោះ អោម ឆៃលីន ភេទស្រីអាយុ១៨ឆ្នាំ អ្នកបើកម៉ូតូម៉ាកហុងដាសេ125 ពណ៍ខ្មៅពាក់ស្លាកលេខ 1M-0566បន្ទាយមានជ័យ ស្លាប់នៅពេលបញ្ជូនទៅសង្រ្គោះនៅមន្ទីរពេទ្យបង្អែក ក្រុងសិរីសោភ័ណនិង អ្នករួមដំណើរឈ្មោះ ឡាម ឡាំផៃ ភេទស្រី អាយុ១៨ឆ្នាំ រងរបួសធ្ងន់ត្រូវបានបញ្ជូនទៅមន្ទីរពេទ្យពរ២ ខេត្តបាត់ដំបង ជនរងគ្រោះទាំង២នាក់ នៅភូមិកំពីងពួយ ឃុំភ្នំដី ស្រុកភ្នំស្រុក ខេត្តបាត់ដំបង មកស្នាក់នៅរៀនថ្នាក់ទី១២ នៅក្រុងសិរីសោភ័ណ ។

លោកវរសេនីយ៍ទោ សួន នីប៉ូ បានបញ្ជាក់ឲ្យដឹងបន្តថាមុនពេលកើតហេតុយុវសិស្សទាំង២នាក់ បានជិៈម៉ូតូមកពីរៀនគួរដើម្បីត្រៀមនឹងប្រឡងថ្នាក់ទី១២ខាងមុខ ពីត្បូងទៅជើង មកដល់ចំណុចកើតហេតុស្រាប់ធ្វើកាឆ្លងផ្លូវជាតិ ស្របពេលនោះ មានរថយន្ត១គ្រឿង ម៉ាកឡុចសីស330  ពណ៏ខ្មៅ ពាក់ផ្លាកលេខភ្នំពេញ.2AP-5305 បើកពីកើតទៅលិចក្នុងល្បឿនលឿននៅពេលយប់បើកមក ដល់កន្លែងកើតហេតុស្រាប់តែបុកម៉ូតូសិស្សកំពុងជិៈឌុបគ្នា បណ្តាលឲ្យអ្នកបើកម៉ូតូស្លាប់និងអ្នករួមដំណើររងរបួសធ្ងន់ ចំណែកអ្នកបើករថយន្តក្រោយពីបុកហើយបានបើករត់គេចខ្លួនបាត់ស្រមោល។ 

លោកបានបន្តឲ្យដឹងទៀតថានៅកន្លែងកើតហេតុនោះប្រជាពលរដ្ឋបាន

ក្តាប់ភិនភាគនិងលេខឡានបាន កម្លាំងនគរបាលជំនាញកំពុងធ្វើការស្រាវជ្រាវ ដើម្បីចាប់អ្នកបើករថយន្តនោះកសាងសំណុំរឿងតាមនិតិវិធីច្បាប់ ៩ចំណែកសពសិស្សនោះក្រុមគ្រួសារបានមកទទួកយកទៅធ្វើបុណ្យនៅផ្ទះតាមប្រពៃណី ៕  

      ដោយ៖ ឧត្តម