ភ្នំពេញ : ហេតុការណ៍អគ្គីភ័យឆាប់ឆេះក្លិបកម្សាន្តមួយ យីហោមីតណាយស្ថិតនៅតាមបណ្ដោយផ្លូវ៥០ម៉ែត្រក្នុងសង្កាត់ព្រៃស ខណ្ឌដង្កោ បង្កការភ្ញាក់ផ្អើលដល់ពលរដ្ឋក្នុងតំបន់ ហើយហេតុការណ៍នេះដែរ សមត្ថកិច្ចបានបញ្ជាក់ថា បណ្ដាលមកពីជាងជួសជុលបានផ្សារដែកនិងធ្លាក់ផ្កាភ្លើងបង្កជាអគ្គីភ័យតែម្ដង ។បានបង្កឲ្យមានការភ្ញាក់ផ្អើលនៅព្រឹកថ្ងៃទី៥ ខែមករា ឆ្នាំ២០២៥នេះ បណ្ដាលឲ្យមានមនុស្សស្លាប់ និងរបួស។
បើតាមលោកសំ វិច្ឆិកា អ្នកនាំពាក្យស្នងការដ្ឋាននគរបាលរាជធានីភ្នំពេញ បានមានប្រសាសន៍ថា តាមព័ត៌មានចុងក្រោយ ពីសមត្ថកិច្ចចុះពិនិត្យដល់ទីតាំង បានបង្ហាញករណីនេះ មានអ្នកស្លាប់ចំនួន២នាក់និងអ្នករងរបួសចំនួន ៥នាក់ ។
លោកបន្តថា មូលហេតុនៃការឆេះនេះ គឺជាងជួសជុលបានផ្សារដែកជួសជុលក្នុងក្លិប ហើយក៏ធ្លាក់ផ្កាភ្លើង បណ្ដាលឱ្យឆេះតែម្ដង ។ បច្ចុប្បន្ននេះ សមត្ថកិច្ចកំពុងកំណត់អត្តសញ្ញាណជនរងគ្រោះដែលស្លាប់ ដើម្បីស្វែងរកសាច់ញាតិមកទទួលយកសពទៅធ្វើបុណ្យតាមប្រពៃណី ។ ដោយឡែកម្ចាស់ក្លិប ម្ចាស់ទីតាំង ក៏ត្រូវបានសមត្ថកិច្ចកោះហៅមកសួរនាំផងដែរ ។
ការសង្គ្រោះនេះ កម្លាំងសមត្ថកិច្ចជំនាញ បានប្រើប្រាស់រថយន្តពន្លត់អគ្គិភ័យចំនួន៥៧គ្រឿង ក្នុងនោះរួមមាន រថយន្តពន្លត់អគ្គិភ័យរបស់ការិយាល័យរាជធានីភ្នំពេញ ចំនួន២០គ្រឿង ប្រើប្រាស់ទឹកអស់៤០ឡាន និងរថយន្តជំនួយមកពីក្រសួងមហាផ្ទៃ ចំនួន៤គ្រឿង ប្រេីប្រាស់ទឹកអស់៦ឡាន, រថយន្តកងរាជអាវុធហត្ថរាជធានីភ្នំេពញ ចំនួន២គ្រឿង ប្រេីប្រាស់ទឹកអស់១ឡាន, រថយន្តកងពលតូចលេខ៧០ ចំនួន៤គ្រឿង ប្រេីប្រាស់ទឹកអស់៣ឡាន, រថយន្តស្រាបៀរកម្ពុជា ចំនួន១គ្រឿង ប្រេីប្រាស់ទឹកអស់២ឡាន, រថយន្តរបស់សួនឧស្សាហ៍កម្មកាណាឌីយ៉ា ចំនួន១គ្រឿង ប្រេីប្រាស់ទឹកអស់១ឡាន, រថយន្តទីក្រុងនរា ចំនួន២គ្រឿង ប្រេីប្រាស់ទឹកអស់២ឡាន។
ដោយឡែកចំពោះប្រភេទសំណង់ខាងលើនេះ គឺថ្មបេតុង ទំហំ (៣៥ម៉ែត្រ x៤០ម៉ែត្រ) ឆេះក្លឹបកម្សាន្ដ យីហោ «មីណាយព្រីមៀរក្លឹប» ចំនួន១ក្លឹប, ម៉ូតូចំនួន៥គ្រឿង រួមទាំងសម្ភារៈក្នុងក្លឹបអស់ទាំងស្រុង ហើយបានឆេះរាលដាលដល់បន្ទប់ផ្ទះសំណាក់ ទំហំ៣,៥ម៉ែត្រ x៥ម៉ែត្រ ចំនួន១បន្ទប់។ ចំពោះគ្រោះអគ្គិភ័យខាងលើនេះ ត្រូវបានកម្លាំងសមត្ថកិច្ចជំនាញ ធ្វើការបាញ់ឲ្យរលត់ទៅវិញ នៅវេលាម៉ោង ១និង៣០នាទីរសៀលនាថ្ងៃខែឆ្នាំដដែរ។
ចំពោះហេតុការណ៍គ្រោះអគ្គិភ័យនេះ កម្លាំងសមត្ថកិច្ចជំនាញបានធ្វើការស្រាវជ្រាវរកឃេីញថា គឺបណ្តាលមកពីជាងផ្សារដែកឆ្លងចរន្តអគ្គិសនីបង្កជាអគ្គិភ័យ។ ប៉ុន្ដែជាអកុសល គ្រោះថ្នាក់សង្គមនេះ បានបណ្តាលឲ្យមនុស្សប្រុសចំនួន២នាក់បានស្លាប់ និងមនុស្សប្រុសចំនួន៥នាក់ទៀតបានរងរបួសធ្ងន់ ត្រូវបានបញ្ជូនទៅសង្គ្រោះនៅមន្ទីរពេទ្យ៕
