ស្ទឹងត្រែង៖ អភិបាលខេត្តស្ទឹងត្រែង ឯកឧត្តម សរ សុពុត្រា បានឱ្យដឹងថា សង្ត្រាន្តឆ្នាំថ្មី នឹងធ្វេីបានមហោឡារិក អធឹកអធ័ម ប្លែកៗ អមដោយផ្ទាំងទស្សនីភាពផ្សេងៗ ដើម្បីបម្រើអារម្មណ៍ប្រជាពលរដ្ឋ និងភ្ញៀវទេសចរ។
ក្នុងពិធីសែនក្រុងពាលី នៅថ្ងៃទី២៩ ខែមីនា ឆ្នាំ២០២៥ នៅទីលាននាគជ័យ មុខសាលាខេត្តស្ទឹងត្រែង លោក សរ សុពុត្រា បានឲ្យដឹងថា ពិធីប្រុងពលីថ្ងៃនេះ ដើម្បីសុំសេចក្តីចម្រើន សុំម្ចាស់ទឹក ម្ចាស់ដី សុំទីកន្លែងថ្មី ដែលទើបនឹងស្ថាបនារួចនេះ ដើម្បីឲ្យប្រជាជនក្នុងខេត្តស្ទឹងត្រែងទទួលបានពរជ័យ សុខសប្បាយ ជ័យជំនះផង និងយកទីលាននាគជ័យ ដើម្បីប្រារព្ធសង្ក្រាន្តឆ្នាំថ្មី ឲ្យមានភាពមហោឡារិក អធិកអធ័មថែមទៀត។
លោកអភិបាលខេត្ត បានបន្តថា ការរៀបចំព្រឹត្តិការណ៍សង្រ្កាន អនុវត្តតាមការណែនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ដែលនៅខេត្តស្ទឹងត្រែង នឹងនាំមកនូវភាពសប្បាយរីករាយជូនប្រជាពលរដ្ឋគ្រប់ៗគ្នា។
ម្យ៉ាងវិញទៀត ដើម្បីបង្ហាញពីភាពផុលផុសនៃការចូលរួមយ៉ាងសកម្ម ក្នុងព្រឹត្តិការណ៍មហាសង្រ្កានរបស់ព្រះរាជាណាចក្រកម្ពុជា ដែលកម្ពុជាកំពុងរៀបចំនូវឯកសារមួយចំនួនដាក់បញ្ជូលទៅអង្គការយូណេស្កូ គឺដាក់សង្រ្កាន្តរបស់ខ្មែរក្នុងបញ្ជីបេតិកភណ្ឌពិភពលោក ដែលថ្នាក់ដឹកនាំកំពុងតែរៀបចំនូវរបាយការណ៍ ជាវត្ថុតាងទាំងអស់ដែលបាន យកទៅបង្ហាញនូវអង្គការយូណេស្កូ។ នៅឆ្នាំនេះផងដែរ មានការរៀបចំសង្រ្កាន្តធំនៅខេត្តសៀមរាប និងបណ្តាខេត្តទាំងអស់គឺរៀបចំព្រមៗគ្នានៅថ្ងៃចូលឆ្នាំថ្មីតែម្តង។
ក្នុងកម្មវិធីសង្ក្រាន្តឆ្នាំថ្មីនៅខេត្តស្ទឹងត្រែង ក៏មានរៀបចំដង្ហែ «ស្ទឹងត្រែងសង្រ្កាន» ចាប់ផ្តើមពីរង្វង់មូលព្រះភិរុណ រហូតដល់វេទិកានាគជ័យ មុខសាលាខេត្តស្ទឹងត្រែង ដែលជាទីតាំងប្រារព្ធពិធីរយៈពេល៣ថ្ងៃនៃពិធីបុណ្យចូលឆ្នាំប្រពៃណីខ្មែរ ដើម្បីឲ្យមហាជនចូលមកកម្សាន្តសប្បាយ គឺចាប់ពីរង្វង់មូលជ័យវរ្ម័នទី៧ រហូតដល់ទីតាំងទីលានតេជោសន្តិភាព ដូចជាកន្លែងសម្រាប់លេងល្បែងប្រជាប្រិយខ្មែរ និងល្បែងកម្សាន្តជាច្រើនទៀតផងដែរ។
សូមជម្រាបថា ពិធីបុណ្យចូលឆ្នាំថ្មីប្រពៃណីជាតិឆ្នាំនេះ មហាសង្រ្កាន នឹងចូលមកដល់នៅថ្ងៃថ្ងៃទី១៤ ខែមេសា ឆ្នាំ២០២៥ វេលាម៉ោង ៤:៤៨នាទីព្រឹក។ [ ដោយ ÷ កុល សារត្ន័ ]
