ភ្នំពេញ : នាព្រឹកថ្ងៃទី២៦ ខែមីនា ឆ្នាំ២០២៥ ស៊ីប៊ីស៊ីសហការជាមួយ ក្លិបអ្នកកាសែតកម្ពុជា រៀបចំកិច្ចពិភាក្សារវាងអ្នកសារព័ត៌មាន និងអ្នកជំនាញក្នុងវិស័យហិរញ្ញវត្ថុដែលមានការចូលរួមពីអ្នកសារព័ត៌មានប្រមាណ៨០នាក់មកពី៥២ស្ថាប័ន។

កិច្ចពិភាក្សានេះមានការចូលរួមពីវាគ្មិនកិត្តិយសដែលរួមមានលោក អឿ សុធារ័ត្ន ប្រធាននាយកប្រតិបត្តិនៃស៊ីប៊ីស៊ី លោក លាង ដឺលុច នាយកប្រតិបត្តិក្លិបអ្នកកាសែតកម្ពុជា លោកជំទាវ ឌិត នីតា ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា និងលោក រ័ត្ន សោភ័ណ ប្រធានសមាគមធនាគារនៅកម្ពុជា ក្រោមប្រធានបទ៖ «កិច្ចពិភាក្សារវាងអ្នកសារព័ត៌មាន និងអ្នកជំនាញក្នុងវិស័យហិរញ្ញវត្ថុក្នុងការចូលរួមផ្សព្វផ្សាយចំណេះដឹងហិរញ្ញវត្ថុ និងការប្រើប្រាស់ឥណទានប្រកបដោយទំនួលខុសត្រូវ»។

តាមរយៈកិច្ចពិភាក្សានេះអ្នកសារព័ត៌មានបានជ្រាបកាន់តែច្បាស់ពីប្រព័ន្ធចែករំលែកព័ត៌មានឥណទាននៅកម្ពុជា និន្នាការនៃទីផ្សារឥណទាន និងកិច្ចសហការរវាងវិស័យសារព័ត៌មាន និងវិស័យហិរញ្ញវត្ថុក្នុងការផ្សាភ្ជាប់គម្លាតរវាងវិស័យទាំងពីរ ដើម្បីជម្រុញបរិយាបន្នហិរញ្ញវត្ថុ និងលើកកម្ពស់ការប្រើប្រាស់ឥណទានប្រកបដោយទំនួលខុសត្រូវ៕