ភ្នំពេញ ៖ កាលពី យប់ ថ្ងៃទី៣០ ខែសីហា ឆ្នាំ២០២២ នៅត្រង់ចំណុចភូមិទំនប់ ផ្លូវ៥៩៨ ស្ថិតក្នុងសង្កាត់ភ្នំពេញថ្មី ខណ្ឌសែនសុខ។
នៅមុនពេលកើតហេតុ គេបានឃើញយុវជនមួយក្រុមមានគ្នា៤ទៅ៥នាក់បានអង្គុយផឹកស៊ីជួបជុំគ្នាយ៉ាងសប្បាយរីករាយនៅត្រង់ចំណុចកើតហេតុ ។ ក្នុងចំណោមយុវជនទាំងនោះ មានយុវជនម្នាក់ដែលមានឈ្មោះល្បីល្បាញនៅក្នុងបណ្តាញសង្គម TikTok ដែលគេស្គាល់ថាឈ្មោះ «កា ខេធីផ្លេ (Ka KT Play)» លុះដល់វេលាកើតហេតុ ក៏ស្រាប់តែមានក្មេងស្ទាវមួយក្រុម មានគ្នាជាង១០នាក់ ជិះម៉ូតូ២ទៅ៣គ្រឿង និងរថយន្តមួយគ្រឿងទៀត ហើយនៅក្នុងដៃប្រដាប់ដោយដាវ និងដុំថ្មស្ទើរគ្រប់ដៃតែម្តង។
ក្រុមក្មេងស្ទាវទាំងនេះ ក៏បានជិះឈប់ ហើយចុះទៅកាប់ប្រហារលើយុវជន ដែលកំពុងអង្គុយផឹកស៊ីទាំងនោះ បណ្តាលឲ្យយុវជនម្នាក់រងរបួសរយះម្រាមដៃ និងយុវជនដែលមានឈ្មោះល្បីល្បាញក្នុងបណ្តាញសង្គម TikTok រងរបួសរយះបបូរមាត់។ បន្ទាប់មកក្រុមក្មេងស្ទាវទាំងនោះ ក៏បាននាំគ្នាគេចខ្លួនចេញពីកន្លែងកើតហេតុបាត់ស្រមោល ដោយបន្សល់ទុកតែកាំបិតមួយដើមនៅកន្លែងកើតហេតុតែប៉ុណ្ណោះ។
ជនរងគ្រោះដែលរងរបួសរយះម្រាមដៃ ក៏ត្រូវបានគ្នីគ្នារបស់គេបញ្ជូនទៅសង្គ្រោះនៅឯមន្ទីរពេទ្យព្រះកុសុមៈភ្លាមៗ។ កម្លាំងកងរាជអាវុធហត្ថក៏បានប្រមូលវត្ថុតាំង និងនាំយុវជនរងគ្រោះទៅកាន់មូលដ្ឋានកងរាជអាវុធហ្ថតខណ្ឌសែនសុខ ដើម្បីធ្វើការសាកសួរ និងដាក់ពាក្យបណ្ដឹងទៅតាមផ្លូវច្បាប់៕
https://www.rmn.asia
