ភ្នំពេញ ៖ ទីតាំងអ៊ីនធឺណិតមួយកន្លែងស្ថិតនៅតាមបណ្ដាយផ្លូវ ៥១ ក្នុងសង្កាត់ផ្សារថ្មី៣ ខណ្ឌដូនពេញ រាជធានីភ្នំពេញ កំពុងបើកទទួលភ្ញៀវមកពីគ្រប់មជ្ឈដ្ឋានសង្ស័យមានភ្លើងខៀវពីអាជ្ញាធរហើយមើលទៅ។
ប្រភពព័ត៌មានពីពលរដ្ឋជាច្រើនបានលើកឡើងថាជារៀងរាល់ថ្ងៃគេសង្កេតឃើញថា មានក្រុមក្មេងស្ទាវជាច្រើនកំពុងតែប្រមូលផ្តុំគ្នាចូលមកលេងល្បែងស៊ីសងនៅទីតាំងអ៊ីនធឺណិតខាងលើនេះ ប៉ុន្តែគេមិនដែលឃើញមានសមត្ថកិច្ចណាម្នាក់ចុះមកបង្ក្រាបឡើយ។
ប្រភពដដែលបានបន្តថា រាល់ថ្ងៃនេះពួកគាត់មានការព្រួយបារម្ភចំពោះសេចក្តីសុខ សុវត្ថិភាព និងភូមិ ឃុំមានសុវត្ថិភាពរបស់ពួកគាត់ព្រោះថាបើទីតាំងណាមានបើកល្បែងស៊ីសងទីតាំងនោះនឹង អាចកេីតមាននូវករណី លួច ឆក់ ប្លន់ជាដេីម។
ប្រជាពលរដ្ឋបានសំណូមពរដល់អាជ្ញាធរមានសមត្ថកិច្ចពិសេសលោក សុខ ពេញវុធ អភិបាលខណ្ឌដូនពេញ និងលោក ទៀង ចាន់សារ អធិការខណ្ឌដូនពេញ សូមមេត្តាចុះត្រួតពិនិត្យនិងបង្ក្រាបល្បែងស៊ីសងខាងលើនេះផងដើម្បីរក្សាការពារសន្តិសុខ និង អនុវត្តន៍នូវគោលនយោបាយភូមិ ឃុំមានសុវត្ថិភាពទាំង៧ចំណុចរបស់រាជរដ្ឋាភិបាលដែរលបានដាក់ចេញ។
សូមជម្រាបថា កន្លងមកលោក ឃួង ស្រេង អភិបាលរាជធានីភ្នំពេញបានប្រាប់ឱ្យ អភិបាលខណ្ឌទាំង១៤ ចុះបង្ក្រាបទីតាំងដែលបង្កប់ល្បែងភ្នាល់គ្រប់ប្រភេទដូចជា ហ្គេមបាញ់ត្រី ហ្គេម Internet Online និងល្បែងស៊ីផ្សេងៗទៀត។
លោក ឃួង ស្រេង បានបញ្ជាក់ទៀតថា បើសិនជា រកឃើញថា ទីតាំងណាដែលបើកល្បែងស៊ីសង ហ្គេមបាញ់ត្រី សេវាកម្ម Internet លួចបង្កប់ការលេងល្បែងស៊ីសង Online ត្រូវតែចាត់វិធានការ តាមផ្លូវច្បាប់ ត្រូវបិទអាជីវកម្មនោះហើយត្រូវធ្វើការឃាត់ខ្លួនម្ចាស់អាជីវកម្មផងដែរ។
ការបញ្ជានេះធ្វើឡើងក្នុងកិច្ចប្រជុំគណៈបញ្ជាឯកភាពរាជធានីភ្នំពេញ ដោយការចូលរួមពីអភិបាលរងរាជធានីភ្នំពេញ ស្នងការនគរបាលរាជធានីភ្នំពេញ មេបញ្ជាការកងរាជអាវុធហត្ថរាជធានី អាជ្ញាធរខណ្ឌទាំង១៤ រួមទាំងមន្ដ្រីជំនាញពាក់ព័ន្ធជារូបច្រើនទៀត។
សូមបញ្ជាក់ថា លោក ឃួង ស្រេង បានសង្កត់ធ្ងន់ថា អាជ្ញាធរមានសមត្ថកិច្ចក៏ដូចជា អាជ្ញាធរដែនដី ត្រូវត្រួតពិនិត្យឱ្យបានម៉ត់ចត់បំផុតមិនត្រូវអនុញ្ញាតឱ្យមានល្បែងស៊ីសងប្រភេទហ្គេមបាញ់ត្រី និងអាជីវកម្មណេតកាហ្វេអនឡាញដែលមានបង្កប់ល្បែងស៊ីសងនៅក្នុងមូលដ្ឋានជាដាច់ខាត ក្នុងករណីដែលមាននៅក្នុងមូលដ្ឋានរបស់ខ្លួនត្រូវបង្ក្រាបភ្លាមៗទាំងអ្នកលេង និងម្ចាស់ទីតាំងដែល ប្រកបអាជីវកម្មខុសច្បាប់នេះ៕
https://www.rmn.asia
