ភ្នំពេញៈ ទីតាំងប្រតិបត្តការហ្គេមអនឡាញ លួចលាក់នៃពួកចិនបានផ្អាកដំណើរការលេងមួយដង្ហើមចង្រិត ហើយក៏បានបើកដំណើរការឡើងវិញ បន្ទាប់ពីសែនបែបបុណ្យសុំសេចក្តីសុខ ដល់អ្នកតាម្ចាស់ស្រុកត្រូវរួចមក ។
«ហ្គេមអនឡាញ» លួចលាក់នៃពួកជនជាតិចិនខាងលើនេះ ពួនសង្ងំប្រតិបត្តិការបានយកទីតាំងអគារភ្លោះទល់មុខគ្នាកម្ពស់៥ជាន់ដែលមានស្លាកយីហោ ផ្គត់ផ្គង់សម្ភារ
សំណង់ ការ៉ូគ្រឿងសង្ហារឹមផ្សេងៗ នៅច្រមុះជ្រូកច្រកចូល វត្តឃ្មួញ តាមបណ្ដោយផ្លូវហាន់ណូយ ស្ថិតក្នុង ភូមិបន្លាស្អិត សង្កាត់ឃ្មួញ ខណ្ឌសែនសុខ រាជធានីភ្នំពេញ។

សភាពខាងក្រៅនៃទីតាំងមើលទៅធម្មតា ហាក់បីដូចជាអគារគេទុកចោល តែទីនោះមានការយាមកាមយ៉ាងតឹងរ៉ឹងបំផុតពីសំណាក់កងកម្លាំងចម្រុះមានស្លៀកពាក់ឯកសណ្ឋាន
តែមិនមានស្លាកឈ្មោះ តាំងពីមាត់ទ្វា ជណ្តើរឡើង និងមុខបន្ទប់នីមួយៗក្នុងន័យការពារ ការជ្រៀតចូលរបស់អ្នកខាងក្រៅ ឬការលួចរត់របស់អ្នកខាងក្នុងនាំអោយបែកការ។

ទីនោះក៍មានសេវាបង្កប់ផ្លូវភេទដែលមានតម្លៃចាប់ពី៣០០ដុល្លារឡើងទៅ ដោយមានការចាត់ចែងពីមេក្រុមចិនតាមផ្នែកនីមួយៗ។ រាល់បុគ្គលិកចិន និង វៀតណាមដែលបម្រើការនៅទីនោះ ចេញ ឬចូលត្រូវមានការអនុញ្ញាតពីថៅកែចិន ឬក៍មេក្រុមចិនទើបអាចចេញឬចូលបានតាមរយៈទ្វារក្រោយផ្នែកខាងត្បូងតាមផ្លូវបេតុង។

កន្លែងប្រតិបត្តការហ្គេមអនឡាញ នេះពួកចិនបានចោលដានយ៉ាងស្អាតគឺចាក់សោបិទទ្វារខាងមុខពុំឱ្យមនុស្សចេញឬចូលឡើយ។ ទីនោះបើគេមើលមួយភ្លែតហាក់បីដូចជា
ស្ងាត់ស្ងៀមល្អណាស់ ប៉ុន្តែអគារនោះអាចផ្ទុកមនុស្សបានខ្ទង់ពាន់នាក់ឯណោះ។ ពីព្រោះនៅតាមបន្ទប់ស្នាក់នៅនីមួយៗមានហាលខោអាវយ៉ាងច្រើនស្អេកស្អះពីខាងលើ។

តាមប្រភពច្បាស់ការណ៍មួយបានប្រាប់អង្គភាពសារព័ត៌មានឱ្យដឹងនៅព្រឹកថ្ងៃទី៩ ខែកក្កដា ឆ្នាំ២០២២ ថា បន្ទាប់ពីមានការចុះផ្សាយរបស់អង្គភាពសារព័ត៌មាន
កាលពីថ្ងៃទី៤ ខែកក្កដា ឆ្នាំ២០២២ កន្លងមក ក្រុមចិនដែលបើកល្បែង ហ្គេមអនឡាញ បានផ្អាកដំណើរការមួយថ្ងៃ ហើយនៅថ្ងៃទី៦ ខែកក្កដា ក៍មានសមត្ថកិច្ចមួយក្រុមចុះ
ទៅសួរនាំ។

ក៍ប៉ុន្តែត្រូវបានថៅកែចិនម្ចាស់ «ហ្គេមអនឡាញ» យកសំណែន សែនថ្វាយដល់អ្នកតាម្ចាស់ស្រុកទើបពួកគេអាចបើក ហ្គេមអនឡាញ ឡើងវិញជាធម្មតា។ ព្រោះពួកចិនរកលុយបានពី ហ្គេមអនឡាញ ក្នុងមួយថ្ងៃៗរាប់សិបម៉ឺនសែនដុល្លារ។ រាល់បុគ្គលិកមកបម្រើការងារនៅទីនេះពួកគេគឺជាជនអន្តោប្រវេសន៍ខុសច្បាប់។

ពួកគេមុននឹងមកធ្វើការនៅក្នុង ហ្គេមអនឡាញ គឺត្រូវមានរថយន្តពណ៌ខ្មៅសេរីទំនើបដើរដឹកជញ្ជូនដោយផ្ទាល់តាមរយៈកងកម្លាំងធ្វើការនៅទីនោះ។
បើចូលទៅដល់កន្លែងធ្វើការពួកគេមិនអាចដើរហើរចេញចូលផ្ដេសផ្ដាស់តាមអំពើចិត្តបានទេ។ព្រោះមានការយាមកាមយ៉ាងតឹងរ៉ឹងបំផុត ហើយមានអ្វីៗគ្រប់យ៉ាងសម្រាប់បម្រើសេចក្ដីត្រូវការដល់បុគ្គលិក។

ប្រភពបន្តទៀតថា ពួកគេកំពុងតែបំបែកខ្លួនលក់សិទ្ធិ «ហ្គេមអនឡាញ» បន្តនៅតាម ម៉ាតឬកាហ្វេ ហើយក៍មានកន្លែងសេវាខ្ចីប្រាក់ដែលមានការប្រាក់ខ្ពស់ផងដែរ។ ហ្គេមអនឡាញ នេះកំពុងតែបំបែកសាខារបស់ខ្លួនយ៉ាងស្ងាត់ស្ងៀមបំផុតជាច្រើនកន្លែងដូចជានៅ អ៊ីអនពីរ ច្បារអំពៅ ក្រុងតាខ្មៅ។

អភិបាល ខណ្ឌសែនសុខ លោក ម៉ូវ ម៉ានិត និងលោក ហួរ ម៉េងវ៉ាង អធិការខណ្ឌសែនសុខ នៅរសៀលថ្ងៃទី៩ ខែកក្កដា ឆ្នាំ២០២២ នេះ ពុំអាចសុំការបំភ្លឺបានទេជុំវិញករណីខាងលើនេះដោយទូរស័ព្ទចូលពុំមានអ្នកទទួល។ ប៉ុន្តែកាលពីរសៀលថ្ងៃទី៣ ខែកក្កដា ឆ្នាំ២០២២ លោកអភិបាល ខណ្ឌសែនសុខ ធ្លាប់បានបញ្ជាក់ខ្លីថា «កន្លែងហ្នឹងបើសិនជាស្រាវជ្រាវរកទៅឃើញ ! យើងនឹងធ្វើការបង្ក្រាបហើយ…! »។

ចំណែកលោក សាន សុខសីហា អ្នកនាំពាក្យ ស្នងការដ្ឋាននគរបាល រាជធានីភ្នំពេញ បានប្រាប់អង្គភាពយើងនៅរសៀលថ្ងៃទី៩ ខែកក្កដា ឆ្នាំ២០២២ នេះថា កន្លងមក រាជរដ្ឋាភិបាល ដូចជាពុំទាន់អនុញ្ញាតឱ្យដំណើរការល្បែងនេះលេងឡើងវិញទេបើតាមលោកដឹង។ ប៉ុន្តែរាល់បទល្មើសដែលកើតមានឡើងសមត្ថកិច្ចយើងមិនព្រងើយកន្តើយឡើយ គឺតែងតែធ្វើការបង្ក្រាប។

គួរបញ្ជាក់ថា រាជរដ្ឋាភិបាលកម្ពុជា បានចេញសារាចរណែនាំមួយស្តីពី «ការពង្រឹង ការគ្រប់គ្រងអាជីវកម្មល្បែងភ្នាល់ តាមម៉ាស៊ីនអេឡិចត្រូនិច តាមរយៈអ៊ិនធ័រណេតអនឡាញក្នុង និងក្រៅប្រទេសគ្រប់ប្រភេទនៅក្នុង ព្រះរាជាណាចក្រកម្ពុជា ដែលមានលិខិតលេខ០៧ សរណន កាលពីថ្ងៃទី២៨ ខែសីហា ឆ្នាំ២០១៩»៕
https://www.rmn.asia