ភ្នំពេញ : នាព្រឹកថ្ងៃទី២៨ ខែសីហា ឆ្នាំ២០២៥នេះ លោក សក់ ច័ន្ទកញ្ញារិទ្ធ អភិបាលនៃគណៈអភិបាលខណ្ឌពោធិ៍សែនជ័យ បានអញ្ជើញជាអធិបតីក្នុងពិធីបើកវិញ្ញាសាប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម្រាប់ឆ្នាំសិក្សា២០២៤-២០២៥ ដោយមានការចូលរួមពីលោកស្រី លីម លាងហួរ អភិបាលរងខណ្ឌ និងលោក ផុន សុផាន អភិបាលរងខណ្ឌ។
កម្មវិធីបើកប្រឡងត្រូវបានរៀបចំឡើងនៅមណ្ឌល អនុវិទ្យាល័យ ហ៊ុន សែន ពោធិចិនតុង និង វិទ្យាល័យចំណេះទូទៅ និងបច្ចេកទេស ហ៊ុន សែន ជម្ពូវ័ន ដែលសុទ្ធសឹងស្ថិតក្នុងខណ្ឌពោធិ៍សែនជ័យ រាជធានីភ្នំពេញ។
សម្រាប់ឆ្នាំនេះ ការប្រឡងបាក់ឌុបត្រូវបានរៀបចំឲ្យប្រព្រឹត្តទៅរយៈពេល ២ ថ្ងៃ គឺចាប់ពីថ្ងៃទី២៨ ដល់ថ្ងៃទី២៩ ខែសីហា ឆ្នាំ២០២៥។ តាមការរាយការណ៍ ពីអាជ្ញាធរ មានបេក្ខជនចូលរួមប្រឡងសរុប ១,៨៣២ នាក់ ក្នុងនោះមានស្រី ១,០០១ នាក់។ មណ្ឌលប្រឡងមានចំនួន ២ គឺ៖
មណ្ឌលអនុវិទ្យាល័យ ហ៊ុន សែន ពោធិចិនតុង មានបន្ទប់ប្រឡងសរុប ៣២ បន្ទប់
មណ្ឌលវិទ្យាល័យចំណេះទូទៅ និងបច្ចេកទេស ហ៊ុន សែន ជម្ពូវ័ន មានបន្ទប់ប្រឡងសរុប ៤២ បន្ទប់។
ក្នុងឱកាសនេះ លោក អភិបាលខណ្ឌ បានអំពាវនាវដល់បេក្ខជនទាំងអស់ឲ្យមានសមត្ថភាពពេញលេញក្នុងការធ្វើតេស្តប្រឡង ដោយមានទំនួលខុសត្រូវខ្ពស់ ក៏ដូចជាការរក្សាសណ្តាប់ធ្នាប់ និងវិន័យក្នុងមណ្ឌលប្រឡង។ ព្រមទាំងបានថ្លែងអំណរគុណចំពោះគ្រូបង្រៀន និងមន្ត្រីជាប់ពាក់ព័ន្ធ ដែលបានខិតខំរៀបចំការប្រឡងឲ្យប្រព្រឹត្តទៅដោយប្រកបដោយប្រសិទ្ធភាព សុវត្ថិភាព និងតម្លាភាព។
ការរៀបចំប្រឡងបាក់ឌុបគឺជាដំណាក់កាលសំខាន់សម្រាប់កំណត់កម្រិតចំណេះដឹង និងសមត្ថភាពរបស់សិស្ស ដែលជាគន្លងដ៏សំខាន់ក្នុងការបន្តការសិក្សានៅកម្រិតអាហារូបករណ៍ ឬជ្រើសរើសឱកាសការងារនាពេលអនាគត៕
