ភ្នំពេញ៖ កម្លាំងអធិការដ្ឋាននគរបាលខណ្ឌដូនពេញ បានចាត់ចែងកម្លាំងជាច្រើន ដើម្បីរក្សាសន្តិសុខ សណ្តាប់ធ្នាប់ និងការពារសុវត្ថិភាព ជូនដល់បេក្ខជន ក្នុងសម័យប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៥ ដែលនឹងប្រព្រឹត្តឡើងនៅថ្ងៃ ព្រហស្បតិ៍ ទី២៨ ខែសីហា ឆ្នាំ២០២៥ (ត្រូវនឹងថ្ងៃទី ៥កើត ខែភទ្របទ ឆ្នាំម្សាញ់ សប្តស័ក ពុទ្ធសករាជ ២៥៦៩)។

សម្រាប់សម័យប្រឡងនៅក្នុងខណ្ឌដូនពេញ គណៈកម្មាធិការប្រឡងបានរៀបចំមណ្ឌលប្រឡងសរុបចំនួន ៧ មណ្ឌល រួមមាន៖
វិទ្យាល័យ ហ៊ុន សែន ប៊ុនរ៉ានី វត្តភ្នំ
បឋមសិក្សា កូលាបទី១
វិទ្យាល័យ ព្រះស៊ីសុវត្ថិ
អនុវិទ្យាល័យ ចតុមុខ
បឋមសិក្សា ចតុមុខ
វិទ្យាល័យ វត្តកោះ
បឋមសិក្សា ព្រះនរោត្តម
ការចុះមកការពារសុវត្ថិភាពនៃកម្លាំងនគរបាល មានគោលបំណងចម្បងក្នុងការធានាបាននូវបរិយាកាសប្រឡងស្ងប់ស្ងាត់ មានសណ្តាប់ធ្នាប់ និងការពារការរំខានគ្រប់យ៉ាង ដើម្បីឱ្យបេក្ខជនអាចប្រឡងបានដោយមានកម្លាំងចិត្ត និងទទួលបានលទ្ធផលល្អបំផុត។

អធិការដ្ឋាននគរបាលខណ្ឌដូនពេញ ក៏បានអំពាវនាវដល់អាណាព្យាបាល និងសាធារណជនឲ្យចូលរួមគាំទ្រ និងបង្កើតបរិយាកាសល្អប្រសើរ ដើម្បីជួយជំរុញឱ្យការប្រឡងជាតិប្រព្រឹត្តទៅដោយជោគជ័យ និងមានសុវត្ថិភាពពេញលេញ៕