ខេត្តបន្ទាយមានជ័យ : នៅ ថ្ងៃទី១៤និងទី១៥ ខែកញ្ញា ឆ្នាំ២០២២ នោះ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ និងលោកស្រី ព្រមទាំងសហការី តំណាង ឯកឧត្តម ស សុខា រដ្ឋលេខាធិការក្រសួងអប់រំយុវជននិងកីឡា និងលោកជំទាវ កែ សួនសុភី ព្រមទាំងពុទ្ធបរិស័ទជាច្រើនរយនាក់បាន ផ្តួច ផ្តើមចូលរួម កាន់វេនភ្ជុំបិណ្ឌ ទី៥ នៅវត្តគីរីរុក្ខារាមថ្មរមៀល ក្នុងភូមិថ្មរមៀលលិចកើត ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ ក្នុងនោះបាននាំយកបច្ច័យចំនួន ២៧.៤៥៩.០០០ រៀល និង ទេយ្យវត្ថុ ទៅប្រគេនព្រះសង្ឃ ក្នុងពិធីបុណ្យកាន់បិណ្ឌវេនទី៥នេះ។
ព្រះចៅអធិការវត្តគីរីរុក្ខារាមថ្មរមៀល បានមានសង្ឃដិកាថា បុណ្យភ្ជុំបិណ្ឌនេះ ជាបុណ្យមួយដែលធំជាងគេ នៅក្នុងចំណោមបុណ្យទាំងអស់ ចំពោះអ្នកកាន់ព្រះពុទ្ធសាសនា។បុណ្យភ្ជំបិណ្ឌនេះត្រូវបានប្រារព្ធធ្វើឡើងរៀងរាល់១ឆ្នាំម្តង តាមប្រពៃណីនៃព្រះពុទ្ធសាសនា ក្នុងនោះមានពុទ្ធបរិស័ទ ប្រជាជន បានបូជាទៀនធូបផ្កាភ្ញីចំពោះ ព្រះរតនត្រៃ សមាទានសីល ធ្វើកិច្ចនមស្សការបង្សុកុលព្រមទាំងបាននាំយកនូវបច្ច័យ ទេយ្យទាន គ្រឿងឧបភោគ បរិភោគ ភេសជ្ជៈ ផ្លែឈើ បាយសម្ល នំចំណី ជាច្រើន មុខទៅវេរប្រគេន ព្រះសង្ឃ ដើម្បីឧទ្ទិសនូវមផលជូនទៅដល់វិញ្ញានក្ខន្ធបុព្វការីជន មានមាតាបិតា ជីដូនជីតា ញាតិការទាំង៧សណ្ដាន និងបុព្វបុរសដែលបានពលីជីវិត ដើម្បីជាតិមាតុភូមិ ដែលលោកបានចែកឋានទៅកាន់ បរលោកខាងមុខហើយនោះ។
ព្រះចៅអធិការវត្តគីរីរុក្ខារាមថ្មរមៀល បានមានសង្ឃដិកាថាបន្តទៀតថា បុណ្យកាន់បិណ្ឌ និងភ្ជុំបិណ្ឌ នេះ ជាបុណ្យមួយតាមបែបពុទ្ធសាសនា សម្រាប់ឧទ្ទិសកុសល ទៅដល់ប្រេតជូនញាតិ ដែលបានធ្វើមរណកាលទៅកាន់លោកខាងមុខ ហើយពិធីបុណ្យនេះបានប្រារព្ធធ្វើ ចាប់ពីថ្ងៃ១រោច ដល់ថ្ងៃ ១៥រោច ខែភទ្របទ ត្រូវនឹងថ្ងៃទី១១ ដល់ថ្ងៃទី២៥ ខែកញ្ញា ឆ្នាំ២០២២ ។
បុណ្យកាន់បិណ្ឌ គេតែងតែប្រារព្ធធ្វើជាប្រពៃណី តាំងពីបរមបុរាណតរៀងមក មានគោលបំណងដើម្បីទុកលទ្ធភាពឲ្យព្រះសង្ឃគ្រប់ព្រះអង្គ ដែលគង់ចាំព្រះវស្សា នៅក្នុងទីអារាម ទទួលការផ្គត់ផ្គង់ពីពុទ្ធបរិស័ទចំណុះជើងវត្ត ទំនុកបម្រុងព្រះសង្ឃ គង់ចាំវស្សាក្នុងវត្តរយៈពេល ៣ខែ ចាប់តាំងពីថ្ងៃចូលវស្សារហូតដល់ថ្ងៃចេញវស្សា និងក៏ជារំឭកដល់វិញ្ញាណក្ខន្ធបុព្វការីជន ដែលបានធ្វើមរណកាលទៅកាន់លោកខាងមុខផងដែរ។
ឆ្លៀតក្នុងឱកាសនោះ លោកឧត្តមសេនីយ៍ទោ សិទ្ធិ ឡោះបានលើកឡើងកាលពីក្នុងអំឡុងការរីករាលដាលនៃជំងឺកូវីដ-១៩ ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា តាមរយៈគោលនយោបាយ យុទ្ធសាស្រ្តស្រោចវ៉ាក់សាំងនៅទូទាំងប្រទេស ដោយឥតគិតថ្លៃដល់ប្រជាពលរដ្ឋ បានធ្វើឲ្យប្រជាពលរដ្ឋមានឱកាសបានជួបជុំ និងគោរពប្រណិបត្តិ សាសនា តាមជំនឿរៀងៗខ្លួន ជាពិសេសធ្វើឲ្យប្រទេសជាតិមានសុខសន្តិភាព ស្ថេរភាព និងមានការអភិវឌ្ឍន៍លើគ្រប់វិស័យផងដែរ ។
លោកឧត្តមសេនីយ៍ទោ សិទ្ធិ ឡោះ បានការថ្លែងអំណរគុណយ៉ាងជ្រាលជ្រៅ ចំពោះប្រជាពលរដ្ឋ ដែលបានបោះឆ្នោតគាំទ្រគណបក្សប្រជាជនកម្ពុជាឲ្យទទួលបានជ័យជម្នះ ក្នុងការបោះឆ្នោតជ្រើសក្រុមប្រឹក្សា ឃុំ/សង្កាត់ អាណត្តិទី៥ ឆ្នាំ២០២២បានទាំងអស់ នេះបានបង្ហាញឲ្យឃើញយ៉ាងច្បាស់ អំពីការស្រលាញ់ពេញចិត្តការដឹកនាំរបស់ សម្តេចតេជោ ហ៊ុន សែន ប្រធានគណបក្សប្រជាជន ដើម្បីដឹកនាំប្រទេស បន្តរក្សាសន្តិភាព និងការអភិវឌ្ឍ បន្តទៀត និងសូមបន្តការគាំទ្រនេះ ក្នុងការបោះឆ្នោតអាណត្តិក្រោយៗទៀត ។
ជាមួយគ្នានោះ ដើម្បីចូលរួមចំណែក និងលើកកម្ពស់វិស័យព្រះពុទ្ធសាសនាលោកបាននាំយកនូវទេយ្យទាន ទេយ្យវត្ថុ និងបច្ច័យបានចំនួន ២៧.៤៥៩.០០០ រៀល សម្រាប់កសាងហេដ្ឋារចនាសម្ព័ន្ធក្នុងវត្ត ព្រះសង្ឃចំនួន៣៨អង្គ ១អង្គ ប្រគេន៤១ម៉ឺនរៀល ទឹកក្រូច១កេស ទឹកសុទ្ធ១កេស ស្លាដក់១ ភេជសជ្ជ:១កន្ត្រក និងនំបញ្ចុក សម្លការីចំនួន១០០គីឡូក្រាម សម្រាប់ជូន លោកយាយ លោកតា ពុទ្ធបរស័ទ ពិសារក្នុងពិធីបុណ្យនេះផងដែរ៕
https://www.rmn.asia
