ភ្នំពេញ ៖ សមត្ថកិច្ចខណ្ឌជ្រោយចង្វារ បានដេញប្រផាប់ចាប់ប្រភីងក្រុមចោរឆក់សកម្ម​ រហូតឃាត់ជនសង្ស័យ ២នាក់ ក្រោយកម្លាំងអន្តរាគមន៍នៃអធិការនគរបាលខណ្ឌជ្រោយចង្វារ ប្រទះឃេីញ​កាលពីវេលាម៉ោង ២រសៀល ថ្ងៃទី២៨ ខែកក្ដដា ឆ្នាំ២០២២។

យោងតាមបញ្ជាក់ពីសមត្ថកិច្ច បានឱ្យដឹងថា ជនសង្ស័យទាំង២នាក់នេះ បានធ្វើសកម្មភាពជិះម៉ូតូមួយគ្រឿង ឌុបគ្នា២នាក់ ឆក់កាបូបពីស្ត្រីម្នាក់ កំពុងជិះម៉ូតូតាមដងផ្លូវនៅចំណុចម្ដុំផ្លូវOCIC ស្ថិតក្នុងសង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។ ភ្លាមៗត្រូវបានកម្លាំងអន្តរាគមន៍នៃអធិការនគរបាលខណ្ឌជ្រោយចង្វារបានឃើញ ក៏ប្រដេញតាមជនសង្ស័យទាំងនេះ ប្រកៀកតាមពីក្រោយ ចេញពីជ្រោយចង្វារ ឆ្ពោះឡើងផ្លូវជាតិលេខ៦អា រួចជនសង្ស័យទាំងនេះ ក៏ជិះម៉ូតូរត់មកតាមផ្លូវOCICវិញ ក៏ត្រូវបាន កម្លាំងអន្តរាគមន៍នៃអធិការនគរបាលខណ្ឌជ្រោយចង្វារ ចាប់ខ្លួនបានទាំង២នាក់តែម្តង។

ក្រោយចាប់ខ្លួន ជនសង្ស័យទាំងពីរនាក់ ត្រូវបានសមត្ថកិច្ចបញ្ជូនទៅកាន់អធិការដ្ឋាននគរបាលខណ្ឌជ្រោយចង្វារ ដើម្បីធ្វើការសាកសួរបន្ត អនុវត្តតាមនីតិវិធី ៕
https://www.rmn.asia