ភ្នំពេញ៖ នៅព្រឹកថ្ងៃសុក្រ ទី៤ ខែកក្កដា ឆ្នាំ២០២៥នេះ ឯកឧត្តម ឧត្តមសេនីយ៍ឯក សុខ វាសនា អគ្គនាយកអគ្គនាយកដ្ឋានអន្តោប្រវេសន៍ ក្រសួងមហាផ្ទៃ បានអញ្ជើញជាអធិបតីធ្វើបាឋកថាវិជ្ជាជីវៈ ស្ដីពី “ការគ្រប់គ្រងច្រកទ្វារអន្តរជាតិ និងច្រកទ្វារព្រំដែនអន្តរជាតិ” ជូនសិក្ខាកាមវគ្គបំប៉នជំនាញ នៃបណ្ឌិតសភានគរបាលកម្ពុជា។
កម្មវិធីនេះ ត្រូវបានរៀបចំឡើងក្រោមការអញ្ជើញពី ឯកឧត្តម នាយឧត្តមសេនីយ៍ សាស្រ្តាចារ្យ ឯក មនោសែន ប្រធានបណ្ឌិតសភានគរបាលកម្ពុជា។ សិក្ខាកាមចូលរួមសរុប ១៥០ នាក់ រួមមានសិក្ខាកាមវគ្គបំប៉នជំនាញគ្រប់គ្រងច្រកទ្វារអន្តរជាតិ និងទ្វេភាគី ព្រមទាំងនគរបាលជំនាញផ្សេងទៀត។
ក្នុងឱកាសនេះ ឯកឧត្តម សុខ វាសនា បានចែករំលែកចំណេះដឹង និងបទពិសោធន៍អាជ្ញាប័ណ្ណខ្ពស់ ស្ដីពីតួនាទី និងភារកិច្ចសំខាន់ៗរបស់អគ្គនាយកដ្ឋានអន្តោប្រវេសន៍ ក្នុងការគ្រប់គ្រងច្រកទ្វារចូលចេញប្រទេស ការស្រង់ពត៌មាន និងវាស់វែងសកម្មភាពចំណាកស្រុក ចំពោះជនបរទេសអន្តោប្រវេសន្ត និងមិនមែនអន្តោប្រវេសន្ត ការអនុវត្តន៍នីតិវិធីចំពោះជនល្មើសច្បាប់ ព្រមទាំងការសហការជាមួយប្រទេសក្នុងតំបន់តាមកិច្ចប្រជុំប្រចាំឆ្នាំទ្វេភាគី និងអាស៊ាន។
ក្រោយបញ្ចប់បាឋកថា ឯកឧត្តមអគ្គនាយក បានផ្តល់សៀវភៅសិក្សាគោលស្ដីពីការគ្រប់គ្រងច្រកទ្វារអន្តរជាតិ ចំនួន ៤៨ ក្បាល ជូនសិក្ខាកាមវគ្គបំប៉នជំនាញនគរបាល និងចំនួន ១០ ក្បាល បន្ថែមជូនសាលាមធ្យមវិជ្ជាជីវៈនគរបាល ដើម្បីធ្វើជាឯកសារសិក្សាសម្រាប់សិក្ខាកាមនាពេលក្រោយ។
ជាបញ្ចប់ ការចូលរួមរបស់ឯកឧត្តម សុខ វាសនា និងប្រតិភូអមជាមួយនាយឧត្តមសេនីយ៍ សាស្រ្តាចារ្យ ឯក មនោសែន បានធ្វើឱ្យកម្មវិធីកាន់តែមានសារសំខាន់ និងជាប្រភពជំរុញផ្លូវចរិតវិជ្ជាជីវៈដល់សិស្សនិងនគរបាលជំនាន់ក្រោយ។ ពួកគេបានថតរូបអនុស្សាវរីយ៍ជាគូសញ្ញានៃការសិក្សាដែលមានតម្លៃក្នុងដំណើរការអភិវឌ្ឍវិស័យអន្តោប្រវេសន៍នាពេលអនាគត៕
