មណ្ឌលគិរី – នៅព្រឹកថ្ងៃទី ២១ ខែកក្កដា ឆ្នាំ ២០២៥ ដែលត្រូវនឹងថ្ងៃទី ១១រោច ខែអាសាឍ ឆ្នាំម្សាញ់ សប្តស័ក ព.ស. ២៥៦៩ លោក ឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី បានដឹកនាំកម្លាំងអន្តរាគមន៍ និងមន្រ្តីនគរបាលជំនាញ ចុះសហការជាមួយកម្លាំងចម្រុះនៃគណៈបញ្ជាការឯកភាពរដ្ឋបាលខេត្ត ដឹកនាំដោយ ឯកឧត្តម ថង សាវុន អភិបាលនៃខេត្ត និងមានការសម្របសម្រួលនីតិវិធីពី ឯកឧត្តម ព្រះរាជអាជ្ញា នៃអយ្យការអមសាលាដំបូងខេត្ត ដើម្បីធ្វើប្រតិបត្តិការបង្ក្រាបល្បែងអនឡាញខ្នាតធំមួយកន្លែង ស្ថិតនៅភូមិពូឆប ឃុំដាក់ដាំ ស្រុកអូររាំង ខេត្តមណ្ឌលគិរី។

ក្នុងការប្រតិបត្តិការនេះ កម្លាំងសមត្ថកិច្ចបានឃាត់ខ្លួនមនុស្សសរុបចំនួន ១៤៩នាក់ ក្នុងនោះមានស្រី ៣១នាក់។ អ្នកសង្ស័យទាំងនេះស្មើនឹង ១៣សញ្ជាតិ បណ្តាលមកពីបរទេសចំនួន ១១៤នាក់ (ស្រី ១៧នាក់) ដូចជា៖
ចិន ១នាក់ (គ្មានលិខិតឆ្លងដែន)
ប៉ាគីស្ថាន ៣៦នាក់ (១០នាក់មានលិខិតឆ្លងដែន, ២៦នាក់គ្មាន)
ឥណ្ឌូនេស៊ី ២៧នាក់ (១នាក់មាន, ២៦នាក់គ្មាន)
បង់ក្លាដេស ១៦នាក់ (៥នាក់មាន, ១១នាក់គ្មាន)
វៀតណាម ៩នាក់ (សុទ្ធតែគ្មានលិខិតឆ្លងដែន)
ឥណ្ឌា ៨នាក់ (៧នាក់មាន, ១នាក់គ្មាន)
ថៃ ៣នាក់ (២នាក់មាន, ១នាក់គ្មាន)
មីយ៉ាន់ម៉ា ៣នាក់ (សុទ្ធមានលិខិត)
កាមេរូន ៣នាក់ (២នាក់មាន, ១នាក់គ្មាន)
នីហ្សេរីយ៉ា ២នាក់ (គ្មានលិខិតឆ្លងដែនទាំងអស់)
សេរ៉ាលីអូន ២នាក់ (សុទ្ធគ្មានលិខិត)
យូហ្គាន់ដា ៤នាក់ (៣នាក់មាន, ១នាក់គ្មាន)
ក្នុងចំណោមទាំងអស់ មានត្រឹមតែ ៣៣នាក់ ប៉ុណ្ណោះដែលមានលិខិតឆ្លងដែន។

បន្ថែមពីនេះ មានជនជាតិខ្មែរ ៣៥នាក់ (ស្រី ១៤នាក់) ដែលបំរើការងារជាអ្នកលក់ភេសជ្ជៈ សន្តិសុខ អនាម័យ និងថែសួន។
វត្ថុតាងដែលដកហូតបានរួមមាន៖
កុំព្យូទ័រលើតុចំនួន ៥៤១គ្រឿង
ទូរស័ព្ទដៃចំនួន ៧៨៨គ្រឿង
គ្រឿងបន្លាស់កុំព្យូទ័រ ជាច្រើន
បច្ចុប្បន្ន កម្លាំងសមត្ថកិច្ចកំពុងធ្វើសាកសួរនិងដំណើរការនីតិវិធីច្បាប់ស្របតាមផ្លូវច្បាប់។

ប្រតិបត្តិការនេះបង្ហាញយ៉ាងច្បាស់ពីការប្តេជ្ញាចិត្តរបស់អាជ្ញាធរខេត្តមណ្ឌលគិរី ក្នុងការបង្ក្រាប និងទប់ស្កាត់សកម្មភាពល្មើសច្បាប់គ្រប់ប្រភេទ ជាពិសេសល្បែងអនឡាញ ដែលកំពុងក្លាយជាបញ្ហាទូលំទូលាយក្នុងសង្គម៕