នៅវេលាម៉ោង ៨:០០នាទី ព្រឹកថ្ងៃពុធ ៧កើត ខែអាសាឍ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី ២ ខែកក្កដា ឆ្នាំ ២០២៥នេះ នៅសាលប្រជុំស្នងការដ្ឋាននគរបាលខេត្តសៀមរាប លោកឧត្តមសេនីយ៍ទោ ហួត សុធី ស្នងការនគរបាលខេត្តសៀមរាប បានអញ្ជើញដឹកនាំកិច្ចប្រជុំបូកសរុបលទ្ធផលការងារកិច្ចប្រតិបត្តិការផ្នែក រក្សាសន្តិសុខ សណ្ដាប់ធ្នាប់សង្គមប្រចាំខែមិថុនា ឆ្នាំ២០២៥ និងដាក់បន្ទាត់ទិសដៅសម្រាប់ខែបន្ត។
ក្នុងកិច្ចប្រជុំនេះ មានការអញ្ជើញចូលរួមពីអង្គភាពនគរបាលការពារបេតិកភណ្ឌ អង្គភាពនគរបាលទេសចរណ៍ លោក-លោកស្រីស្នងការរងទាំងអស់ នាយការិយាល័យចំនួន ៣៣ នាយអធិការនគរបាលក្រុង-ស្រុកចំនួន ១៣ នាយប៉ុស្តិ៍នគរបាលរដ្ឋបាលចំនួន ១០០ និងនាយប៉ុស្តិ៍ការពារ (ចំណុះការិយាល័យនគរបាលការពារបេតិកភណ្ឌ) ចំនួន ៦ ។
ក្នុងឱកាសនោះ លោកឧត្តមសេនីយ៍ទោ ស្នងការ បានលើកសរសើរចំពោះស្មារតីទទួលខុសត្រូវរបស់កងកម្លាំងនគរបាលក្នុងការបំពេញភារកិច្ច សម្រួលការរក្សាសន្តិសុខសាធារណៈ ថែមទាំងការចូលរួមការពារកិច្ចប្រជុំនានា និងការប្រមូលផ្ដុំកងកម្លាំងអន្តរាគមន៍ពិសេសជាប្រចាំ។ សម្ដីរបស់លោកបានរំលឹកឱ្យបន្តអនុវត្តន៍បំពេញតួនាទីភារកិច្ចដោយស្មោះត្រង់ និងមានប្រសិទ្ធភាពបន្ថែម។
ក្នុងអត្ថបទណែនាំបន្ថែម លោកស្នងការបានបញ្ជាក់ឱ្យកងកម្លាំងនគរបាលទាំងអស់បន្តពង្រឹងការរួបរួមសាមគ្គីភាពផ្ទៃក្នុង បង្កើនសមត្ថភាពជំនាញមុខងារ ជាពិសេសការប្រមូលព័ត៌មានដែលពាក់ព័ន្ធនឹងសភាពការណ៍សន្តិសុខសង្គមក្នុងតំបន់។
លោកបានរំលឹកឱ្យយកចិត្តទុកដាក់ជាពិសេសលើការបង្រ្កាបក្រុមក្មេងទំនើង និងអ្នកប្រព្រឹត្តអំពើអុកឡុករំខានសាធារណៈ រួមទាំងបទល្មើសគ្រប់ប្រភេទ។ ជាជំហានបន្ត អង្គភាពត្រូវមានវិធានការបង្ការ បង្ក្រាបឱ្យកាន់តែមានប្រសិទ្ធភាព និងគ្រប់គ្រងស្ថានភាពឱ្យមានស្ថិរភាពជាប្រចាំ។
លើសពីនេះទៅទៀត លោកស្នងការបានផ្ដល់អនុសាសន៍បន្ថែមអំពីការផ្តល់សេវាសាធារណៈឱ្យប្រជាពលរដ្ឋតាមមូលដ្ឋាន ត្រូវអនុវត្តឱ្យមានល្បឿន និងប្រសិទ្ធភាពក្នុងការឆ្លើយតបតាមតម្រូវការរបស់សាធារណជន។
នៅកិច្ចបញ្ចប់ លោកឧត្តមសេនីយ៍ទោ ហួត សុធី បានជូនពរដល់កងកម្លាំងនគរបាលទាំងអស់ឱ្យបានសុខភាពល្អ ជោគជ័យគ្រប់ភារកិច្ច និងទទួលបានពុទ្ធិពរទាំងបួនប្រការគឺ អាយុ, វណ្ណៈ, សុខៈ និងពលៈ ៕
