ខេត្ដបន្ទាយមានជ័យ ៖ អនុវត្តន៍តាមការណែនាំ និងបទបញ្ជារបស់លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ នៅថ្ងៃទី១៨ ខែវិច្ឆិកា ឆ្នាំ២០២២ កម្លាំងនគរបាល ការិយាល័យនគរបាលប្រឆាំងបទល្មើសបច្ចេកវិទ្យា ដឹកនាំដោយលោកវរសេនីយ៍ឯក ឃួន វណ្ណា ស្នងការង ជំនួយដឹកនាំផែនការងារសន្តិសុខ បានចុះស្រាវជ្រាវនិងបានកោះហៅឈ្មោះ អឿន ធី ភេទប្រុស អាយុ៥១ឆ្នាំ មុខរបរមន្រ្តីរាជការសាលាស្រុកស្វាយចេករ មកបំភ្លើលើករណី ដែលបានឡាយក្នុងហ្វេសបុកឈ្មោះបងញ៉ក់ភូមិភាស ជុំវិញពត៌មានក្លែងក្លាយដែលបង្កចលាចលដល់សង្គមនេះហើយ។
មន្ត្រីសាលាស្រុកស្វាយចេក ម្នាក់ បានធ្វើសកម្មភាពថតរូបបង្ហោះនិងឡាយ អំពីសកម្មភាពប្រជាពលរដ្ឋ ទិញលក់ស្រូវ ត្រូវបានឈ្មួញក្រឡុកហាងឆេងឡើងចុះតាមអំពើចិត្ត ដែលខ្លឹមសារនោះបាននាំឲ្យប៉ះពាល់ដល់ សន្តិសុខសណ្តាប់សង្គម និងបានចោទប្រកាន់នានានាំឲ្យប៉ះពាល់ដល់លោកអភិបាលស្រុកស្វាយចេកយ៉ាងធ្ងន់ធ្ងរផងដែរ កាលពីថ្ងៃទី១៧ ខែវិច្ឆិកា ឆ្នាំ២០២២ ។
ក្រោយពីការសាកសួរនាំរួចមក ឈ្មោះ អឿន ធី បានទទួលស្គាល់កំហុស និងបានអះអាងថាខ្លួនពិតជាបានថតឡាយមែន មកពីខ្លួនស្រវឹង។ បន្ទាប់ពីបានដឹងពីកំហុសហើយ សាមីខ្លួនបានសុំទោសជាសាធារណ:ចំពោះប្រជាពលរដ្ឋនិងលោកអភិបាលស្រុកស្វាយចេក។ សមត្ថកិច្ចជំនាញក៏បានឲ្យគាត់ធ្វើកិច្ចសន្យាបញ្ឈប់ប្រព្រឹត្តបទល្មើសបន្តទៀត ក្នុងករណីមិនរាងចាល សមត្ថកិច្ចនឹងមានចំណាត់ការតាមផ្លូវច្បាប់៕
https://www.rmn.asia
RaksmeyNews ព័ត៌មានទាន់ហេតុការណ៍ សូមទំនាក់ទំនងផ្ដល់ព័ត៌មាន 012 278 222
