ព្រះរាជពិធីអុំទូកលើកនេះគឺអធិកអធមតាមការអះអាងរបស់គណៈកម្មាធិការជាតិរៀបចំបុណ្យជាតិ-អន្តរជាតិ បានឱ្យដឹងថា ឆ្នាំនេះ មានទូកចំនួន ៣៣៧ទូក និងប្រទីប ៣០ នឹងចូលរួមប្រណាំង និងបណ្តែត ក្នុងព្រះរាជពិធីបុណ្យអុំទូកនាពេលខាងមុខ ដែលនេះគឺជាចំនួនច្រើនបំផុតមួយ

Byrmnasia

Nov 27, 2023

ភ្នំពេញ : នៅក្នុងព្រះរាជាណាចក្រកម្ពុជា ដែលប្រជាពលរដ្ឋគ្រប់ស្រទាប់វណ្ណៈត្រូវសម្រាកបីថ្ងៃដើម្បីចូលរួមអបអរ និងកម្សាន្តសប្បាយនឹងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក។

តាមការគ្រោងទុក ព្រះរាជពិធីតាមបែបប្រពៃណីនេះ នឹងប្រព្រឹត្តទៅចាប់ពីថ្ងៃ១៤ ដល់១៥ កើត និងថ្ងៃ ១រោច ខែកក្តិក ត្រូវនឹងថ្ងៃទី២៦ ដល់ថ្ងៃទី២៨ ខែវិច្ឆិកា ឆ្នាំ២០២៣ ដូច្នេះសូមប្រជាពលរដ្ឋគ្រប់ស្រទាប់វណ្ណៈមកចូលរួមឱ្យបានច្រើនកុះករ ខណៈដែលព្រះរាជពិធីនេះនឹងរៀបចំនៅកន្លែងដដែល ដូចដែលបានរៀបចំពីមុន គឺនៅតាមដងទន្លេសាបរហូតដល់ទន្លេចតុមុខ មុខព្រះបរមរាជវាំង រាជធានីភ្នំពេញ។

នៅក្នុងឆ្នាំនេះ ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នឹងមានសភាពអធិកអធមជាងបណ្តាឆ្នាំកន្លងមក ពីព្រោះថាឆ្នាំនេះគឺជាឆ្នាំទី១ ដែលកម្ពុជារៀបចំព្រឹត្តិការណ៍នេះឡើងវិញ ក្រោយពេលដែលបានផ្អាកអស់រយៈពេល៣ឆ្នាំ ដោយសារតែការរីករាលដាលនៃមេរោគកូវីដ១៩ ជាបន្តបន្ទាប់។

តាមការអះអាងរបស់គណៈកម្មាធិការជាតិរៀបចំបុណ្យជាតិ-អន្តរជាតិ បានឱ្យដឹងថា ឆ្នាំនេះ មានទូកចំនួន ៣៣៧ទូក និងប្រទីប ៣០ នឹងចូលរួមប្រណាំង និងបណ្តែត ក្នុងព្រះរាជពិធីបុណ្យអុំទូកនាពេលខាងមុខ ដែលនេះគឺជាចំនួនច្រើនបំផុតមួយ។

ប្រភពដដែលបានឱ្យដឹងទៀតថា ព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីសក្ការៈដ៏ខ្ពង់ខ្ពស់បំផុត ព្រះអង្គសព្វព្រះរាជហឬទ័យ ស្តេចយាងជាព្រះរាជាធិបតីដ៏ខ្ពង់ខ្ពស់បំផុត ក្នុងព្រះរាជពិធីបើកការប្រណាំងទូក នាថ្ងៃទី២៦ ខែវិច្ឆិកា និងព្រះរាជពិធីកាត់ព្រ័ត្រ នៅរសៀលថ្ងៃទី២៨ ខែវិច្ឆិកា ឆ្នាំ២០២៣។

គណៈកម្មាធិការជាតិរៀបចំបុណ្យជាតិ-អន្តរជាតិ បានបន្តថា ទូកដែលមកចូលរួមនៅក្នុងព្រះរាជពិធីនេះ មានទូកអុំចំនួន ១៥៨ទូក ទូកចែវបុរស ៤២ទូក ទូកចែវនារី ១ទូក ទូកខ្នាតអន្តរជាតិបុរសចំនួន ១៣៥ទូក ហើយមានចំណុះទូកសរុបទាំងអស់ចំនួន ២ ០៤៤ នាក់ ដែលមកពីក្រសួង ស្ថាប័ន អង្គភាព និងរដ្ឋបាលរាជធានី-ខេត្ត សរុប ២៥។ ហើយសម្រាប់ប្រទីបគឺ មកពីក្រសួង និងស្ថាប័នរដ្ឋចំនួន ២៨ និងប្រទីបវិស័យឯកជនចំនួន ២ ដែលនឹងធ្វើការបណ្តែតតាមដងទន្លេសាប រហូតដល់មុខព្រះបរមរាជវាំង។

ក្រៅពីពិធីផ្លូវការនៅមុខព្រះបរមរាជវាំង នៅពេលព្រលប់នឹងមានការបាញ់កាំជ្រួច ការប្រគំតន្រ្តី ការរៀបចំស្តង់ពិព័រណ៍លក់ទំនិញ និងមានស្តង់អាហារ រួមទាំងកម្មវិធីជាច្រើនទៀត៕

https://fb.watch/o6UCVuisSe/?mibextid=6aamW6
https://www.rmn.asia
https://t.me/+cYqQWKH24_I5ZjE1
https://youtu.be/hWRgRrI4jZk