ក្នុងរយៈពេល ២៤ម៉ោងវៀតណាមរកឃើញករណីឆ្លងកូវីដ-១៩ដល់ទៅជាង១ម៉ឺននាក់RMN.ASIA ./August 21, 2021វៀតណាមជាប្រទេសទប់ស្កាត់ការឆ្លងកូវីដ-១៩ បានយ៉ាងល្អបំផុតក្នុងតំបនអាស៊ាន ក៏ដូចជានៅជុំវិញពិភពលោក។ ប៉ុន្តែនៅពេលនេះអត្រាអ្នកឆ្លងនៅប្រទេសវៀតណាម បានបំបែកកំណត់ត្រាជាបន្តបន្ទាប់ ។ ក្នុងរយៈពេល ២៤ម៉ោងកន្លងមក វៀតណាមរកឃើញករណីឆ្លង រហូតដល់ «១០,៦៥៧ករណី» និងស្លាប់៣៩០នាក់ទៀត ។សារព័ត៌មាន VietNam News នៅយប់ថ្ងៃសុក្រ ទី២០ ខែសីហា ឆ្នាំ២០២១ បានដកស្រង់ការប្រកាសរបស់ក្រសួងសុខាភិបាលវៀតណាមនៅយប់ថ្ងៃសុក្រនេះដែលបានប្រកាសរកឃើញករណីឆ្លងថ្មីៗ នៃជំងឺកូវីដ-១៩ រហូតដល់១០,៦៥៧ករណីបន្ថែមទៀត ដែលជាតួលេខឆ្លងប្រចាំថ្ងៃដ៏ខ្ពស់មួយទៀតសម្រាប់ប្រទេសអាស៊ានមួយនេះ។ក្នុងចំណោមករណីឆ្លងថ្មីៗខាងលើ មានតែ៧ករណីប៉ុណ្ណោះជាករណីនាំចូល ក្រៅពីនោះជាករណីឆ្លងក្នុងស្រុកទាំងអស់ ខណៈទីក្រុងហូជីមិញដែលជាចំណុចកណ្តាល នៃការផ្ទុះរីករាលនៃជំងឺនេះបានរ៉ាប់រងករណីឆ្លងថ្មីតែឯងរហូតដល់ ៣,៣៧៥នាក់។នៅក្នុងថ្ងៃសុក្រនេះដែរ ក្រសួងសុខាភិបាលវៀតណាមក៏បានប្រកាសរកឃើញអ្នកស្លាប់ថ្មី ដោយសារជំងឺដ៏កាចសាហាវនេះចំនួន ៣៩០នាក់ទៀតផងដែរ។គិតត្រឹមយប់ថ្ងៃទី២០ ខែសីហា ឆ្នាំ២០២១នេះ វៀតណាមមានករណីឆ្លងកូវីដ-១៩ សរុបនៅទូទាំងប្រទេសចំនួន ៣៣២,២៦៨នាក់ ក្នុងនោះអ្នកជំងឺជាសះស្បើយចំនួន ១៣២,៨១៥នាក់ ខណៈចំនួនអ្នកស្លាប់កើនដល់ ៧,៥៤០នាក់៕