រថយន្តហាយឡិនឌ័រមួយគ្រឿងរួមដំណើរមានគ្នា 3 នាក់ចុះទូកដរបណ្ដាលឲ្យជ្រុល ធ្លាក់ពីលើទូកលិចចូលក្នុងទន្លេបាសាក់ស្ថិតនៅក្នុងភូមិព្រែករុន ស្រុកស្អាង(មានវីឌីអូ)

ខេត្តកណ្ដាល: នៅថ្ងៃទី១៥ ខែសីហា ឆ្នាំ២០២១ វេលាម៉ោង៩:២០នាទីព្រឹក ស្ថិតនៅចំណុចកំពង់ចម្លងព្រែកតូច ក្នុងភូមិព្រែករុន ឃុំព្រែកគយ ស្រុកស្អាង ខេត្តកណ្ដាល មាន រថយន្តម៉ាកហាយឡិនឌ័រមួយគ្រឿងពណ៌សដែលពាក់ស្លាកលេខ2AN-1302 រួមដំណើរដោយមានគ្នាបីនាក់ បានបើកចុះដើម្បីឆ្លងទូកដរ បណ្ដាលឲ្យជ្រុលធ្លាក់ពីលើទូកលិចចូលក្នុងទឹកទន្លេបាសាក់ ។តាមប្រភពពីកន្លែងកើតហេតុបានឲ្យដឹងថា អ្នកបើកបរឈ្មោះ សាម សុវត្ថ ហៅថ្លោក ភេទ ប្រុស អាយុ៤៩ ឆ្នាំ មុខរបរជា មន្ត្រីនគរបាលប៉ុស្តិ៍រដ្ឋបាលតាលន់ ។ករណីនេះបង្កឡើងដោយសារអ្នកបើកបរថ្វីប្រហែសខ្វះការប្រុងប្រយ័ត្នទើបបណ្ដាលឲ្យរថយន្តធ្លាក់ទៅក្នុងទឹកទន្លេ ត្រូវបានម្ចាស់ទូកដរនិងប្រជាពលរដ្ឋនៅកន្លែងកើតហេតុជួយ សង្គ្រោះទាន់ពេលវេលាទើបមិនបណ្ដាលឱ្យមាននរណាម្នាក់រងរបួសនោះឡើយ៕ដោយ : អក្ខរា១០