ភ្នំពេញ ៖ គិតត្រឹមរសៀលថ្ងៃទី២៣ ខែកញ្ញា ឆ្នាំ២០២២នេះ ម៉ូតូប្រមាណជាង១,០០០គ្រឿងបន្ថែមទៀត ត្រូវបានកម្លាំងសមត្ថកិច្ចដកហូតនៅទីតាំងបញ្ចាំដោយខុសច្បាប់ នៅឃ្លាំងរំសេវ ក្នុងខណ្ឌទួលគោក។
ដោយទទួលបានបទបញ្ជារដ៏ខ្ពង់ខ្ពស់ ពី ឯកឧត្តម ឃួង ស្រេង អភិបាលរាជធានីភ្នំពេញ ឯកឧត្តម ឃ្លាំង ហួត អភិបាលរងរាជធានីភ្នំពេញ ដោយមានការចូលរួមពី លោក ជា ពិសី អភិបាលខណ្ឌទួលគោក លោកព្រះរាជអាជ្ញារង លោកក្រឡាបញ្ជី លោកអធិការ លោកមេបញ្ជាការ លោកប្រធានមន្ទីរហិរញ្ញវត្ថុ លោកប្រធានមន្ទីរពានិជ្ជកម្ម ប្រធានសាខាពន្ធដាខណ្ឌទួលគោក និងអាជ្ញាធរ សង្កាត់ ភូមិ បាន បើក យុទ្ធនាការ បោសសម្អាត ឃ្លាំងរំសេវ ស្ថិតក្នុងសង្កាត់ទឹកល្អក់ទី៣ ខណ្ឌទួលគោក ។
រយៈពេល៥ថ្ងៃចសប់ពីថ្ងៃទី១៩ ខែកញ្ញា ឆ្នាំ២០២២ដល់ថ្ងៃទី២៣ ខែកញ្ញា ឆ្នាំ២០២២ជាលទ្ធផលកម្លាំងសមត្ថកិច្ចបាន ដកហូតបានម៉ូតូ ចំនួន១១១៣គ្រឿង រថយន្ត ចំនួន ១៤គ្រឿង Passapp ចំនួន ១២គ្រឿង កង់បី ចំនួន ០៩គ្រឿង ប្រគល់ម៉ូតូជូនជនរងគ្រោះវិញចំនួន ១០គ្រឿង។
ក្រៅពីម៉ូតូប្រមាណជាង១,០០០គ្រឿងនេះ កម្លាំងសមត្ថកិច្ចក៏បានឃាត់ខ្លួនមនុស្សជាបន្ដបន្ទាប់ ចំនួន៩នាក់ ក្នុងនោះម្នាក់ជាមេក្លោងធំ ហើយត្រូវបានបញ្ជូនទៅធ្វើការសួរនាំបន្ដនៅអធិការដ្ឋាននគរបាលខណ្ឌទួលគោក។ សូមបញ្ជាក់ យុទ្ធការនេះនឹងបន្តក្រោយភ្ជុំបិណ្ឌទៀត បងប្អូនដែលមិនទាន់រករបស់ដែលខ្លួនបានបាត់ក្នុងយុទ្ធនាការណ៍មុនភ្ជុំនេះ កុំទាន់អស់សង្ឃឹម សូមព្យាយាមបន្ថែមទៀត។
យ៉ាងណាមិញ ប្រតិបត្តិការនេះមិនទាន់ត្រូវបានបិទបញ្ចប់នៅឡើយទេ ពោលប៉ុន្មានថ្ងៃមកនេះ លោក ឃ្លាំង ហួត បានដឹកនាំកម្លាំងគណៈបញ្ជាការឯកភាពរាជធានីភ្នំពេញ ដោយអនុវត្តតាមបទបញ្ជារបស់លោក ឃួង ស្រេង ចុះពិនិត្យទីតាំងបញ្ចាំដែលសង្ស័យថារកស៉ីបញ្ចាំដោយខុសច្បាប់រៀងរាល់ថ្ងៃ នៅក្នុងមូលដ្ឋានខណ្ឌទួលគោក ដោយមានការចូលរួមពី លោក ជា ពិសី អភិបាលខណ្ឌផងដែរ។
ឯកឧត្តម ឃ្លាំង ហួត បានអំពាវនាវដល់អ្នករកសុីខុសច្បាប់ទាំងឡាយ សូមកែខ្លួនត្រលប់មករកសុីទទួលទានដោយសុចរិតវិញ និងសូមអំពាវនាវដល់បងប្អូនប្រជាពលរដ្ឋទាំងអស់ជួយគាំទ្រដល់ប្រតិបត្តិការណ៍នេះ ននិងសហការណ៍ ផ្ដល់ព័ត៌មានដល់ សមត្ថកិច្ចដែលចុះអនុវត្តការងារ៕
https://www.rmn.asia
